On brut avans
L'han tróvà quand fiócava in si gradin
d'óna cesa lontana, abbandonà,
al g'aveva noev ann, stó por meschin
pien âd fam, pien âd fred, tut'âstrassà.
Balórd dal sogn, in mes ai quisturin
ad not, sóta la nev, par la città
l'è andat sensa pagura al sò destin,
sensa lagrim, convint, e rassegnà.
Visin a 'n bórsaroe e ón malvivent
l'ha ripósà invóltià dentr'ón capott
che 'na guardia g'ha dat pietósament.
Ma ón brigadier svegliandal tut a 'n bott:
"Chi l'è 'l tò padar?", e lu mes indórment:
"Mè padar l'han massà dâl nóvantott!"