Novella IX della Giornata I del Decamerone. Badia
Novella IX della Giornata I del Decamerone. Badia
I dijará duncue che al tëmp dl pröm Re de Cipro, spo che Godifré de Buglion â concuisté la Tera Santa, él sozedü che na nobla signura de Guascogna é jüda teco na pelegrina al Sant Sepolcher, y tl dé ota da iló, rovada a Cipro éra gnüda vilanamënter strabaciada da valgügn omi scelerá: de chësta cossa i dorôla zënza consolaziun y ara s' á ponsé de jí dal Re a se baudié; mo al i é sté dit da zacá, ch' ara fajess la fadia debann, porcí ch' al ê de na vita tan flacia, y tan bun da nia, che ater co al vendicass cun iustizia les ofejes fates ad atri, che al nen soportass zënza fin de chëres ch' i vëgn fates ad ël instës cun na fiaca, ch' an ne pó laldé: en tant, che chichessî che n â öna ch' i borjâ sö le cör, s' la parâ ia cun la sbroché zënza möia o se dodé. La signura ad aldí chësta cossa, zënza speranza de se podëi vendiché, almanco por se consolé de süa möia, se tolera dant d' orëi rebeché la meseria dl Re; y jüda pitognan dant ad ël ára dit: "Mi Signur, iö ne vëgni ala tüa presënza por vendëta ch' i oress chirí dla ingiüria che m' é stada fata, mo por sodesfaziun da chëra, te prëii, che te m' insëgnes coche tö soportes chëres che i aldi che te vëgn fates acioche imparan da te, iö pois soporté la mia cun paziënza; che Idî pagina:653 le sá, sce i le podess fá, te la donassi a te, porcí che t' es tan brau da les porté. Le Re, che fina chësta é sté pëigher y frat, sciöche al s' ess descedé dal sonn, scomencian dala ingiüria fata a chësta signura, ch' al á vendiché rigorosamënter, é deventé n rigorosiscim persecutur de vignun che cometess val' cossa cuntra l' onur dla corona da chësta inant.