N salut al calënder
N salut al calënder.
Te salude, blot pitl calënder di Ladins,
Scrit per chëi de Gherdëina y si ujins!
Scebën che mo jëunn, de cater ani permò śën,
Mpo truepes t’ aspieta y te liec vere gën.
Scebën che de scritura no mo drë’ franch,
Ai Ladins i ieste drët nteressant,
Y ëi se god a pudëi liejer si rujeneda,
La rujeneda dl’ oma, da d’ ëi tan stimeda.
Sci, te salude mo n iede de cuer, tan plu,
Percie tu nes es permò drët descedà su,
Śën i onse dat n guant a nosta rujeneda,
Scebën che velch minova che la foss’ tosc fineda.
O no desprezëde nosta rujeneda, stimëla
De cuer, tenila al aut y bën cultivëla!
La ie y nes sarà for de gran benedescion,
Percie mé cun chësta matenieronse nosta nazion.