Munadaeg smalik
—1—[1] Suäm: fenigs 20.
Munadaeg smalik.
Lifamag damatik in süf bal
pelovepolöl de deutänapük
nügenel e kademal volapüka plo Rusän.
Damatil at fa Gustav v. Moser, pelovepolom de deutänapük in volapük pötü zälam yubüpa balsayelik volapüka e peplösenom in S. Peterburg, Rusän, domü ob 1889 kilul 26 [= folul 7]. — Damatil at smajönik flagom plepadamis vemo nemödik e paplösenom nefikulo, sikodo pakomedom vemo volapükaklubes e soges jäföl volapüki.
Sivöp
Eduard Heinrich Mayer, Leipzig, Rossplatz 16.
Büvöd
[edit]Lots pastimöl oba! Vekömob nu olis in topöp, kö
Motöfadel väpüka balsayelik pazälom.
Yels te bals egoloms sis Schleyer pädal mäkabik et
Evolekom döli: Pük valemik binomöd.
Tim vo nelonedik! Sikodo milagobs mostepi ut
Volapüka milagik, kel palogom valöpo.
Pak at lemakabik gälom obis sovemo, das
No kanobs klemön benovipön balvoto.
In taladils valik volapük nu labom züpelis, e
In taladils valik oseniton adeli.
Obs li sötobs fögetön löliko deli makabik at?
No dunobsöd atosi! Kozälobsöd yubüpi!
Läds e söls pastimöl! Kelosi olilols foviko is
Nog nevelo pelilos; is ozitos balidno.
Do damats mödumik jünu pelovepoloms ya
In volapük, nevelo eplösenon somiki.
Län obsik binomöd lebalid, kelöp ujenos, e
Zif Peterburg binolöd sam posdunik votikes!
Oplösenon damati pelovepolöl al yubüp at;
„Munadaeg smalik“[3]; so damatil panemom.
Us popükos dö stelav e dö damatal sikik Haase
Dö testudaf, loegöp, fits e lakifs lelodik.
No desänob sesagön nog plu dö damat smajönik at.
Gälodomöd valikis! No spälolsöd läsevi!
Pösods
[edit]| Pösods: | Pösods edamatelöl pötü plösenam balid. |
|---|---|
| Bernhard Streber, plofed | söl Karl Werner. |
| Fanny, ofmatel omik | vomül Alma Iversen. |
| Felix Flott | söl Heinrich Dramm. |
| Anna, ofmatel omik | vomül Ida Lindström. |
Städ: Cem peblimöl liegiko in löd de Flott. Nedeto lestuls tel ko tab. Deto litöp ko bifoins, kels kanoms pakikön. Yans in zenod, deto e nedeto.
Smasüf 1.
[edit]Felix: Anna! Friedrich Haase pledom adelo in „Parthie Piquet“. (Paud smalik; lenlogom Anna. Anna fovof vobön.) Lilö, Anna! Friedrich Haase pledom adelo as Chevalier Rocheferrier in „Parthie Piquet“, kiöp pledom gudiküno.
Anna (Voböl): Pledomöd!
Felix: No li vipol golön al teat? Okopanob viliküno oli.
Anna: Felix löfik! Elogobs ya ofeno kanali at mäkabik. Avendelo bizugob blibön domo e binön ladälik.
Felix: Benö! (loviko) Ladäl binom ga jönikünos. (kleiliko) Ab Haase pledom gudiküno in damatil et.
Anna: Lesi — ab emilagobs ya kilna omi, ebo as Rocheferrier.
Felix: No kanon milagön säto ofeno Friedrich Haase. Lemäno, al kiöp kanobs golön avendelo? (liladom gasedi.)
Anna: Felix, fögivolös obe; ab niludob, das tikol tu mödo, liko kanol gälodön plö dom, pla sükön läbi olik is, in löd ola.
Felix: (seiföl): Lesi! (mojedom gasedi, sustanom, siadom oki denu vifiko, sumom buki). Fovo osükob läbi obik is, in löd oba!
Anna: Logolös, nu vedol denu zunik; leno ävilob leblamön oli. (ti dlenöl) Vo, dalob, sagön lenosi.
Felix: (loviko): Dikod pavitomöd! (kleiliko) Anna löfik, sevol ga obi; sükob nevelo gälodi somik, kiöp ol no kanol dilsumön.
Anna: Zelado; gönob ladliko gälodi alik ole, ab mutol konsidön krüti vola dö ol it: binol man ematöl.
Felix: (seiföl): Eko, kelosi tikof — (kleiliko) Zelado — okonsidob — nen dot!
Smasüf 2.
[edit]Streber (maniföl lafiko yani): Li binos pedälöl?
Felix (kosgolöl): Eko — plofed löfik!
Anna (sustanöl): Spelob, das no kömol soalik. No li koblinol ofmateli yunik ola?
Streber (plütiko, stifäliko): I of okömof foviko — ofmatel yunik oba.
Anna (yofiko): A! atos binos legudik; oblibols lä obs du vendel, nen dot!
Felix (loviko, jonölo boso nekoteni smalik): Fätiko! (kleiliko) Si, lesi — okodos gäli vemik obes.
Streber: No nolob tikadi kimik ofmatel obik labof tefü blibam.
Anna: O, Fanny oblibof zelado, nen dot. Omekob foviko plepadis valik. Fögivö, söl plofed! No, no; säk at binom pelivöl, oblibols! No li also, Felix? (mogolof al nedeto).
Felix: Lesi!
Smasüf 3.
[edit]Felix: Somo, vilols blibön is du vendel lölik; äs sagon: binön ladälik in famül.
Streber: No li pötos ole?
Felix (sumöl häti plofeda): Lesi; mopladolöd häti olik — pötos, lesi — os binos, if dalob binön känüdik: avendelo edesinob bosi votik.
Streber: A, if binos also, no vilob tupön olis; omogolob foviko.
Felix (kipöl nami): No zesüdos; esuemob osi no somo, — Siadolöd oli, begö! So! (siadoms okis. Felix lofom zigadaveadi.) Li vipol zigadi?
Streber: Danob vemo.
Felix: Lilö — kanol golön ko ob.
Streber (klinöl glätis lüna okik): Li ko ofmatels obsik?
Felix (yofiko): O God! Matel yunik egelo ko ofmatel oka! Binos lejeikik! Äsif mens no alabomsla tikis votik. No, plofed löfikün; atna nen läds.
Streber: Binob ematöl nog tu nelonedo, al letön ofmateli soalik.
Felix: Läds bofik kanofs blibön kobo; atos pötos legudiko. If binon ematöl yels mödumik binos benodik vemo, if ofmatel labof kösömi blibön sotimo soalik; osüenol poso atosi. (Flapom joti ome) Benö, son bäledik oba, kokömolöd! Li?
Streber (zogöl): Ö — no nolob.
Felix: Benö — neletüb sibinom luvelatiko: no ogetol dismüti!
Streber: Ö — kisi tikol?! If pükob lisäliko ko Fanny — — stupö!
Felix (dlanöl): Kludo säk binom pelivöl — kokömol.
Streber: Ö, ö! Sagolöd, begö: al kiöp vilol also golön?
Felix: Godö, binos gälod nesinikün: elabob döli golön al klub benofidik.
Streber (pajeköl): Kisi?!
Felix: Si, al klub benofidik. Ab pajekol, äsif bos nekösömik ozidos us. No dledö! Emiton testudafi, e melafits flifik enakömoms — nos plu!
Streber: Ö — lilö — no niludob, das ofmatels obsik obinofs kotenik, if ogolobs al us. Klub benofidik ebo no palöfom fa läds. Nolofs, das us pükaton ofeno kofiko dö mat.
Felix (ropöl omi): Godö — sog usik pakosiadom te de mans ematöl — binos te cog!
Streber: Pasagos sägo, das epledon sotimo lukadis in klub.
Felix: Binos mögik, das ezidos semüpo, ab te püliküno — äs flentänels sagoms „en passant“ — plo ob, plo ol, plo ob, plo ol — te demü cog — yoföf — te as nebajäf. Lanimö, kokömolöd! Ogälodol magifiko.
Streber: Ö — sagolöd begö: ofmatel olik li dälof ole golön al us?
Felix: Li dälof? Dälön! Logolös, atos ebo binos suemam nevelätik. Sagon takediküno: „cil löfik, ogolob al us u al us“ — plösenon foviko osi as jeni fümik — as „fait accompli“ — finö! (sustanom) Leno söton lukösömon ofmatelis; lesagob ole: lukösömam binom badikünos.
Streber: Ab — ofmatel olik änolof nosi dö atos, äs äjinos obe.
Felix: Osagob osi ofe sosus ukömof, foviko. Atos binos fikul smalikün! (lofom nami ome) Benö, li okokömol? Vo, dunolöd segun konsäl gudik oba, no lukösömolöd ofmateli olik — no söton dunön osi — voto dalöpofs sölami nefikulikumo ka niludol.
Streber (loviko): Vipob vemo bepükön büo atosi ko Fanny obik, efe nen lilöls. (kleiliko) Also, ol i desänol säkön büo?
Felix: Lesi (loviko) Bizugob dunön osi nen lilöls. (kleiliko) Ogolob foviko al ofmatel obik; pos minut bal obinos pebepüköl! Sunüno obinob denu is. (mogolom al nedeto).
Smasüf 4.
[edit]Läsevob, das no söton lukösömön ofmatelis yunik; luüno matels valik sagoms otosi. — Ö! Binos smilik bido: no labob ti kini sagön al Fanny obik, das vilob golön al klub benofidik. Ebo al klub at! If äkanobla lilön kimiko Flott nunom ofmateli oka dö atos! Li vögs? Binob in stad lielön — te demü plak. (tlidom len yan nedetik e lielom) „Cil löfik“ — a! — Godö! atos äbinos kid! — (loviko) kludo kid i binom zesüdik; benö, ob i kanob osi. (lielom denu, pajeköl) Niludob, das kömoms al is. (lüvom vifiko yani) Vo, mutob lilön atosi! Ab liko? (jonom litöpi) A — us! Binos vo te demü lenadam! So! (sävom oki po bifoin len litöp).
Smasüf 5.
[edit]Anna: Ab kiöp plofed obsik binom?
Felix (loviko) Binos gudik, das no binom is. (kleiliko) Luvelatiko — ekosgolom al Fanny oka.
Anna: Eko, matel lobik.
Felix (seniko): Lesi, ti äs ob! (kid).
Streber (loviko): Jinos, das kids binoms zesüdik vemo alos.
Felix: Cil löfik, pidob levemo, ab efögetob bosi veütik; no okanob blibön is du vendel lölik.
Anna (pesüpitöl): Liko — ? E kisi desänol?
Felix: Binos nelesumik vemo obe, ab — mutob mogolön.
Streber (loviko): A — nu vedos nitedik.
Anna: Al kiöp mutol mogolön? Binos ga selednik.
Felix: Si, leno etikob osi, ab —
Anna: Vedob nulälik.
Felix: Koköm lakifanas zidom adelo.
Anna: Lakifanas kiom?
Felix: Nolol ga: labedobs lakifis anik leloda Aachen-Maastrich, e binos veütik vemo plo ob vögodön in lasam.
Streber (loviko): A — flen löfik, kapälob: lakifs olik stadoms badiko.
Anna: So! — Ab no li memob gudiko? No li eliladob ävigo dö lasam valemik? Si, lesi! Lasam at ezitom ya.
Felix (stunöl, pesüpitöl): Li ävigo? — Si — lesi, atos ebinos demü bligats leloda at, segivot balid, tonab A — ab adelo votikos pobepükos, ofmatel löfik! — Kokömon adelo demü üllakifs — segivots votik — dividens — lesi, o ofmatel löfik! Adelo löliko votikos!
Streber (loviko): Li binos mögik nevelatön somo?
Anna: Ab labedobs suami so pülik, das no nedol läsön in lasam. Vögod olik oflunom nemödo sludis — blibolös is adelo.
Felix (lifliko e fümiko): No, no, no! Sevob bligi obik, obliboböv viliküno is — odulifoböv vendeli lesumikün ko ols —.
Anna: O — cedob, das kanol osi, Felix löfik!
Felix: No, no, leno! Mutob fino panunön plobo dö yeg at lölik — Aachen-Maastricht.
Streber: (loviko): O cüt kimik! O lupul!
Anna (loviko): Binom gitik baladilo! (kleiliko) Ab kikod ememol osi ebo anu?
Felix (kofudik) Ö — cil löfik! — — Plofed obsik, Streber, äs nolol, binom kuladik vemo; ebo at emebom obi tefü atos; binob danik vemo ome; niludob, das om i labedom lakifis anik.
Streber (loviko): O — if alabobla somikis!
Anna: Kludo okopanom oli.
Felix: Lesi — okogolom.
Anna: A — liedö! In zid at mutob votön plepadamis obik. (Vilof mogolön).
Felix (sumöl nami ofik): No zunolös obe — no ogekömobs zelado al vendelafid — lasam ovedom luvelatiko tepik boso. (Kidom tepiko nami ofik).
Anna (seniko): Li kanob zunön ole demü atos? — Ye letolös obi! Plofed ko ofmatel okömom foviko.
Felix (lamöl Anna, mogolom ko of al nedet): O Anna löfik oba! Dämö! Avendelo obinosöv zelado so ladälik — ab no kanob luletön bligi obik! (bofiks mogoloms al nedeto).
Smasüf 6.
[edit]So — so! Eko kimiko plösenol osi as jeni fümik — as „fait accompli“. (Posdunöl) Te osagob osi ofe! Ö, ö — kelos zidos in mats anik! — Ab ob, kisi sötob dunön? Ob osagob osi stedo al Fanny obik. Mutob kogolön, voto otikom, das —; epömetob ome kopanön omi. — (Lielölo) A — jinos, das lilob stepi de Fanny.
Smasüf 7.
[edit]Streber (kosgolöl): Fino ekömol, o Fanny obik!
Fanny: Li fino? Ga nek valadom obi. E kiöp lotelöls obsik binoms? (livof hätatani).
Streber (desumöl häti e klöfi): Binoms is nebo, lanel obik.
Fanny: Stunob, das elüvoms oli. Li noloms, das eblibol soalik is?
Streber: Si — niludob, das pükoms dö lelodalakifs okik.
Fanny: (yofiko): Obs juitobs bizugi tefü atos: labem obsik no mekom obis kudön.
Streber: No, bi no labobs somiki — cil gudik oba.
Fanny: (seniko): Deno binobs läbik — no li also, Bernhard? Adelo binobsös yofik voiko kobo.
Streber: Ö — cil löfik!
Fanny: Kis mufälos oli? Li binol neyofik?
Streber (stunöl, pesüpitöl): No tadilo — ab no okanob binön yofik ko ol.
Fanny: O God! Jekol obi!
Streber: No — no pajekolöd — binos te — mutob, os binos edesinob —.
Fanny: Benö, pükolöd ga! (loviko) Kis ezidos?
Streber (loviko): Li binos mögik nu sagön ofe, das edesinob golön al klub benofidik? O — o! (kleiliko) Fanny löfikün —
Fanny: (seniko): Kis ejenos? Pükolöd känüdiko — o man löfik!
Streber (loviko): No kanob sagön osi. If alabobla lakifis anik leloda Aachen-Maastricht — abinoböv in stad — (kleiliko) Desinob adelo bosi.
Fanny: So — mutol mogolön — binos pidik! Spel blibön kobo avendelo igälom ya obi.
Streber: Si, obi i. (loviko) Ab nu binob pefanöl. Kisi sötob sagön ofe? (kleiliko) Ab no binos mögik blibön, cil obik.
Fanny (seniko ai): No li dalob nolön kikod mutol mogolön?
Streber (zogölo): Mutob — mutob golön al loegöp stelavik, cilil!
Fanny: (stunöl): Al loegöp stelavik?
Streber: Si! Munadaeg smalik zidom adelo — e desänob loegön omi. (loviko) O God, o God!
Fanny: Ö, munadaeg! Atos binos nitedik.
Streber: Si — nitedik vemo. (loviko) No lesevob obi it.
Fanny: No memob, das ililadob bosi dö munadaeg adelik; osükob foviko notedi tefik in pokakaled obik. (gleipof in pok).
Streber (foviko): No — no sükolös — no otuvol osi in kaledil.
Fanny: O, lesi — munadaegs valik binoms penömodöl in om.
Streber: No — munadaeg adelik binom munadaeg nenomamafik. (loviko) O God!
Fanny: Liko — ? Li sibinoms munadaegs nomamafik e nenomamafik? Etidol nevelo atosi obe.
Streber: Si, munadaegs nenomamafik — nololös — no kapälol atosi, cil obik — atos binos te nolik! — Nenomamafiks —
Fanny: A — dido mutol al loegöp — nen dot!
Streber (loviko): O cil at gudik! Jinos obe, das binob menalufidel — ab nu binob in tläp.
Fanny: Li ememol balüdo is atosi, Bernhard löfik?
Streber (kofudik): Si — lesi — ifögetob löliko atosi, ab flen Flott emekom obi senitön osi; — Flott okopanom obi.
Fanny: Plidos obe, das stelav nitedom söli Flott.
Streber (seiföl): Si — gälos i obi. (loviko) Jinos obe, das binob no fovo ob it. (kleiliko) Dani Gode! kömoms.
Smasüf 8.
[edit]Anna: O Fanny löfik oba! Fögivolös, das emekob oli valadön. (lamofs e kidofs balvoto).
Felix (al Streber): Nu — pükolöd — li esagol ya osi?
Streber (loviko): Ab at no smilomöd luüno! (kleiliko posdunöl) Lesi — valikos binos peleodöl.
Felix (neklödik): Li velatiko?
Streber: Nen dot — eplösenob osi as jeni fümik — as „fait accompli“ — finö!
Felix (loviko): Devels valik! Ofmatel smalik oma binof lisälik — no eniludob osi. (kleiliko): Kludo, li ogolobs?
Streber: Dido! E li ol i efinol ya bepükami?
Felix: Lesi — fikul äbinom smalikün.
Streber: A — benö! (loviko) O cütel lakifik!
Fanny (al Anna): Pidob, das matels obsik mogoloms.
Streber (al Felix): Li elilol?
Felix (al läds): Si, pidobs levemo.
Anna: Jäfs binoms veütikum.
Streber (kofudik): Li jäfs?
Felix (vifiko): Si — ofmatel obik nemof osi „jäfs!“
Streber: A, so! (loviko) Evedob kofudik löliko.
Fanny (al Felix): Li okopanol mateli obik?
Felix (galaniko): Lesi. Binos lobik vemo, das egevol däli ome. Ofmatels no valik binofs so lisälik.
Fanny: O — binol tu gudlik, söl Flott! Binos ga demü lenadam!
Felix (loviko): Vom venudikün. Suemof bizugiko lifi.
Fanny: Tefos noli — e nol binom jäf, binom cal omik.
Felix: Suemam magifik! Nol domü Borchard! O — if Anna obik abinofla somik! (kidom nami ofa) Lestimob oli, o läd divik!
Fanny: Sis kitim jäfol stelavi, söl Flott?
Felix: Kisi vipol?
Fanny: Begö, plänolös obe: kis binos munadaeg nenomamafik?
Felix: Li munadaeg?
Streber: (epüköl jünu loviko ko Anna. Loviko): Plänam at kanom vedön pöligik. (kleiliko): O Fanny, dälol binön tugalanik kol ol.
Anna (al Felix): Ab ol binol tugalanik.
Felix: Leno — (al Streber) Sagolös begö: dö munadaeg kiom ofmatel olik pükof?
Streber: Ofmatel plofeda labof sotimo dölis somik. (loviko) Jekö! Nu mutob nog lesagön, das binof (jonöl flomi) fopik.
Anna: Kömolöd, o Fanny löfik — siadolöd oli nebü ob — söls obsik omogoloms suno. (Siadofs okis).
Felix: Okömob foviko, osumob te guni gudikum.
Anna: Niludob, das atos no binos zesüdik plo sog somik.
Fanny: Ob i cedob somo, söl Flott!
Felix (sumöl lami de Streber): Kömolöd! (kleiliko) Binos mögik, das omutob pükatön — cilil! — Kömolöd, Bernhard! (Mogolöl lenlogom Fanny e sagom lemufölo kapi) Munadaeg?! (Mogolom ko Streber al deto.)
Smasüf 9.
[edit]Anna: Nu musamobsös, offlen löfik. Konolös bosi dö matalif yunik olas. — Li binol kotenik tefü matel olik?
Fanny: O, binom man gudikün — vo, binob läbik vemo, Anna löfik!
Anna: Labol mateli takedälik e plobik, mateli löföl oli.
Fanny (yofik e cogöl): Si löfom obi — e bukis oka!
Anna: A, binolös kotenik e läbik! — Ob i vipob labön te kodi somik glöta.
Fanny: Dledob te, das matel obik binom tu dutik. Äs nolol, no labobs labemi, e sikodo steifom mödön ninsumis dub vob plivadik du düps livik oka.
Anna (voböl): Niludob, das labols lakifis anik leloda Aachen-Maastricht. Spelob, das epölüdols nosi[4] pötü oms.
Fanny (jötöl vobi, smilöl): Li obs? — lakifis de Aachen-Maastricht? — Leno. Kikod eniludol osi?
Anna: Eniludob osi, bi matel olik nolom detülis valik tefü lakifs at.
Fanny: Li om nolom detülis tefü lelodalakifs? (Smilöl) Niludob, das tikom töbo al oms —; cedob sägo, das leno nitedoms omi. (fovof vobön).
Anna: Binos selednik! Om emebom mateli obik tefü lasam valemik lakifanas.
Fanny: Atos ekanos jenön te fädo!
Anna: Selednö!
Fanny (pos paud nelonedik): Binos lesumik vemo obe, das matels obsik evedoms flens. — Egälos vemo obi panunön, das stelav nitedom mateli olik. Atos onilom umo omis. (vobof).
Anna: Li obiki? Li stelav nitedom omi? Kikod niludol atosi?
Fanny (voböl takedo): Si; emebom bü düps anik mateli obik tefü munadaeg zidöl adelo; voto Bernhard no itikomöv atosi.
Anna (stunöl): Pölol, o cil löfik; atos binos nemögik.
Fanny (jötof vobi): No li nolol atosi? Avendelo goloms ga kobo al loegöp stelavik, al loegön munadaegi.
Anna: Pölol. Leno tikoms al atos. (smilof): Al loegöp stelavik? — Leno! Goloms al lasam valemik lakifanas de Aachen-Maastricht.
Fanny (smilof): Kisi matel obik odunom in lasam at? Lesagob ole: goloms al loegöp stelavik; kanol klödön obe. Matel it oba esagom osi obe.
Anna: Ag! I matel obik esagom obe, das olik okopanom omi al lasam valemik. (Bofiks sustanofs e vedofs pianiko fekik).
Fanny: O Anna löfik, matel obik no osagom nevelati obe; kanob lesagön osi.
Anna: Cil löfik: obik i no odunom osi; nolob osi fümiküno.
Fanny: No kapälob, liko kanol tikön somikosi dö Bernhard bafik oba.
Anna: E ob no suemob, kelosi tikol dö Felix obik.
Fanny: Aliko, matel obik esagom velati.
Anna: Ab ob konfidob obike: no akinomöv nevelatön.
Fanny (süköl sevegi): No zanobsös! Binos nefikulik panunön dö velat.
Anna: A! Kömoms; ologobs lesuno.
Smasüf 10.
[edit]Felix (in sütagun, ko hät): Kömolöd; sagobsöd adyö ofmateles obsik. (al Fanny) O läd pastimöl, fögivolös mogoli obsik; ye nol —
Fanny (al Anna): Eko! „Nol!“
Felix (al Anna): Adyö, Anna löfik oba! No tuvob vödis al sepükön pidi vemik oba, das mutob —
Anna: Vödi lebalik, Felix!
Felix (galaniko): O — vendel lölik, if alabobla timi, ofmatel löfik! (Golom ko Anna al flan nedetik)
Fanny: Bernhard löfik, labob säki al ol! (Golof ko Streber al flan detik. Sets suköl papükoms ti togo e vifiko) Al kiöp vilol golön adelo ko söl Flott?
Streber: Al — al — loegöp stelavik, cil löfik!
Anna (al Felix): Li binos velatik? Golols kobo al —
Felix (vifiko): Al lasam de Aachen-Maastricht — lesi!
Anna (golöl vifiko al Fanny): Logol: ob esagob velätikosi.
Fanny (stunöl): Kisi atos malos?
Anna (nätiko): Dotof nog ai.
Streber (stanöl nog deto): Vedos hitik; selednö! Levipob gläti vata kalodik.
Felix (stanöl nedeto): Senob kalodi; cedob, das glät vina stenüdik omenodom stadi at.
Anna: Nen dot, mikapälüb sembal sölom is — aliko flanü ol.
Fanny: Begob sekusadi, no! Ol it elilol: papükos dö stelav.
Felix: Leno kapälob kelosi viloms.
Anna: Ga esagol velati obe!
Felix: Nen dot! (loviko) No kanob blibön is. (kleiliko) Lilö, o plofed löfik — no sükolöd zivegi, pükolöd stedo!
Streber (stunöl): Kisi sagol? Kisi?
Felix (smilöl pemütölo): Läd pastimöl, kanob lesagön ole, das no evilom golön al klub benofidik — leno!
Anna: Fanny (stunöl) Klub benofidik?!
Streber: Ab Felix! O God!
Felix: Jötolös vinegis! Fe esagom osi ole, ab deno no ogolomöv al us, leno! — Vilob plänön osi ole: matel olik espälom makis anik e elemom lakifis anik leloda Aachen-Maastricht. Ats binoms nu nedelidik vemo. Binos süpitot plo ol! — Ifi num lakifas omik binom pülik, deno ävilom panunön adelo dö detüls valik jäfa at, e sikodo ävilom golön ko ob.
Fanny: Li binos mögik, Bernhard?!
Anna: A! Logolös! No kanol zunön ome demü atos. Man gudik ävilom süpitön oli. (loviko) Felix obik äbinom känüdik.
Fanny: Bernhard löfik oba, li binos velatik?
Streber (fefik, na ikomipom linedo): No, no e no! No kanob fovön nog cüti at lakifik.
Felix (pesüpitöl): Ab, plofed —
Streber: No! no ogolob veitikumo. Fanny, adelo munadaeg nonik zidom; i no elemob lakifis de Aachen-Maastricht; — mutob koefön valikosi: evilobs golön al klub benofidik.
Felix (loviko): Adyö! O „moc-turtle!“
Anna: Kisi atos ga malos?
Fanny: O luman, ol! E demü atos leod in sil esötom patupön e munadaeg esötom zidön? O plofed, ol! O glejäpel, ol! (Kidof omi.)
Anna: E ol, Felix?
Felix (loviko): Dani Gode, das läd smalik smilof; nu ofmatel obik omutof i smilön. (kleiliko, smilöl) Si evilob kogolön, cilil. Kon dö Aachen-Maastricht äbinom mär.
Anna (pesüpitöl): Ag! Kikod mutob dalifön somosi? O! (dlenölo) Binob neläbik vemo, levemo — (dlenof).
Felix: Ag, sül obik! (al Streber) Binol vo lupul! Elüvol, eluletol obi!
Fanny: Ab Anna — (kidof ofi).
Streber (tlodölo): O läd löfik oba! Dledob, das i ob binob kod.
Anna: No, no! (dlenöl) Binol nog matel yunik, kele fögivon valikosi. Ab Felix emutom binön känüdik. (Dlenof nog umo. Felix esiadom oki su lestul).
[TOGO] Streber (tlodölo): Ob binob kod, ob soalik.
[TOGO] Fanny: Si, obs binobs kod, Anna.
Felix (sustanöl süpito e lätlidöl): No, no — no kanob nog nevelatön. Cüts valik pajötomsöd, o Anna löfik; lesevob negiti obik. (fefikumo) Nog balna fögivolöd atosi obe; des nu obinob egelo känüdik. Begö, o Anna, fögivolöd obe.
Anna: If kanob klödön osi. — (lenlogof omi).
Felix: Zeladö, o Anna! (golom ko of al bäkun) Kömolöd, neluimolöd dlenis olik!
Fanny (bliböl yofik): Sagolöd obe, Bernhard: li binob tuvemaf somik, das dledol sagön obe, if vilol segölön?
Streber: Ofmatel löfik, gudik oba — emutob — esötob — evilob —
Fanny: Benö, jötolös sekusadi. (tädöl pledölo) O matel badugik! Valadolöd! Ojonob ole loegöpi stelavik ola!
Streber (kidöl nami ofe): O Fanny gudik!
Fanny (al Anna): Nu jonobsös mateles obsik, das obs binobs lisälik: dälobsös omes golön al klub.
Anna (yofiko): No; pön smalik mutom sukön.
Felix (vifiko): No, no, no! — Ob i sevob bligi obik. Adelo no osegolobs, ifi pelon balioni obes. Li no, plofed? Bizugobs ladäli famülik. (loviko) Valadolös!
Fanny: I no padälos oles.
Anna: Avendelo blibobs kobo e opledobs lukadis. Votikna ogetols dismüti.
Fanny (yofiko): Ifi munadaeg nonik zidom. (Matels bofik kidoms namis ofmatelas oksik).
Streber: Ifi nenomamafik.
Küpets (fonät: ‚Wikisource’).
[edit]- ↑ Sevabo: „Bukil balid”. Ma pübot timapenäda: „Zi [zü] vol lölik” dätü del balid tobula ün 1889 esludoy ad dabükön pämodi ko fredadramat at, e ma nun dätü del balid dekula ün 1889 pämod at ya pedabükon.
- ↑ Tiäd pegeton de pübot balid in gased: „Zi vol lölik” (nüm: 8 yeloda telid). Us i päbükon nün dö dediet, kel defon in patabükot at: „Lovepolam at pakösekom plofede dl. Siegfried Lederer in Wien as flene divikün e volapükele plobikün fa lovepolel”. El Lederer it älägivom lä dediet et küpeti sököl: „Ebükob kösekami at, tos kanos jinön demü atos, das binob nemükik. Ab eniludob das no lensumön kösekami äbinosöv nof gletik lovepolela sikik, keli löfob as fleni känüdik; sikod no evotob vödemi, tos lob pegivöl obe binom vo tu gletik e danob plo meug so stamafulik obe. Vilob jinön vilikumo nemükik ka binön nedanik”.
- ↑ Deutänapüko: ‚Eine kleine Mondesfinsterniss’. Kanoy reidön rigädi Deutänapükik bevüresodo.
- ↑ Ma pübot balid: „Spelö epölüdols nosi”.