Miynetti súy (Qayıpnazarov)
Kim miynetti súyse, onı xalıq súyer,
Watan-ana erdiń qadirin biler,
Halqı ushın xizmet islegen erler,
Hadal miynetiniń ráhátin kórer.
Hár kim miynet etse jeter kamalǵa,
Miynet-baxıt keltiredi adamǵa,
Watan ana jiyirkenip qaraydı,
Miynet etpeytuǵın jalqaw-jamanǵa.
Miynet etken maqsetine jetedi,
Ǵayrat etseń jumıs ta ónip ketedi,
Jurttan ozıp shıqqan miynet erine,
Hámme basın iyip húrmet etedi.
Miynet etiw húrmetli is, isley bil,
Miynet penen qıya shólde jaynar gúl,
Miynet etip tawday tabıs dóretseń,
Húrmet etip, alǵıs aytar million til.