Mittheilungen des historischen Vereins zu Osnabrück/Vom König Wieck und Karl Mang

Vom König Wieck und Karl Mang

(Aufgezeichnet vom Justiz-Bürgermeister Stüve.)

     In der Sweden-tyt wören der twe Borgen, de eene up den Pyesbierge un de annere up’r Wyeksbuorg. In der Buorg up’n Pyesbierge wuande en Kiönig, de hedde Carolus Magnus. In de Buorg up’r Wyecksbuorg wuande en änneren Kiönig, met namen Wyeck. Carolus magnus de wass een Kriste und Wyeck de wass een Heede. Carolus Magnus wuel nu nich mer hebben, dat Wyeck een Heede bleif un löit em seggen, he soll een Kriste weerren. Aberst Wieck löit em wier seggen, dat wuel he nich, he wuel leewer een heede blieven, wyl em de heeden relijon bieter gefuölle. Da wörd Carolus Magnus iärgerlick und Syä, dann solle den Wyeck de donner slauen, he solle doch een Kriste wären, un dat he dat nu rehe kreige, sett he sick mit alle syn volk to päre un rückede den Wieck up den balg bet voer de Wyecksbuorg. Ass nu de Wyeck dat verspürde, dat de Carolus[217] M. em to balge woll, da makede he syne Poorten to un dachte, nu konne em de Carolus nix dohn. Aberst de Carolus hadde eene graute yserne Karnone metebrocht un schaut darmet den Wyeck de Poorten un de gansse Wyecksbuorg sau kort und kleen, dat de Wyeck vor angst un naut nich mer wüsste, wo he blywen soll. Ass nu de Wyeck gaar nich meer wüsste, wo he blywen soll un wo he in un uth soll, do gaff he sick der too und Siähe, Carolus M. soll em doch man dat Liäven lauten, wenn et nich anners syn konnde, dann woll he auk woll een Kriste weerden un all syn Volk darby. Da loit nu Carolus Magnus dür eenen papen, den he metbracht harre, den Wyeck un syn volk in de bielmsken Kierke ut den döpe-stenne, de hüte nau midden in de Kierken steet un wo de hilligen un de Sprüche in uhtehowwen sind, döpen. Unnerdessen dat se nu den Wyeck in de bielmsken Kierken dööpeten, loit Carolus Magnus de Wyeksbuorg düür syn Volk verdesteuehren, dat keen steen up en annern bleif. Ass nu de Wyeck wier na de Borg kamm un sag, dat syn gansse kraum verneeld was, iss he van hier wegtrocken und synt der tyd nich wier kuamen. Carolus Magnus aber is dernau mit synen ganssen Volke wyder in den Krieg trocken un de Sweden hewwet em dann nau der tyd syne buorg up’n Pyesbierge auk verdesteuerd. De Sweden hebbet den Carolus Magnus auk nich utstaan konnt, wyl he katholsk was, de Sweden aberst luttersk wören. In de tyd hebbet de Katolsken un de Luttersken nau viel meer striet un spectakel met eenander hatt, ass se nu hebbet un dat gansse eelend sall ass de aulen lüe segget, in der aulen tyd, just ass nu, blaut van de papen heerkuamen syn. Wenn hüte de papen et nich diäen, dann sollen sick de katolsken un[218] luttersken auk woll bieter verdriägen un jüst so goat, ass in miene jungen Joaren, dou de Lüe nau den glauben hadden, de katolsken un de luttersken hädden eenen Gott un wer man Recht däe up Aerren, de soll nau dusser tyd auk woll to Gott kuomen.