Milajan (Qayıpnazarov)
Moyılday shashlarıń, ayday júzleriń,
Iba etkenleriń kórgen waqtaǵı,
Lal etip janımdı alar kózleriń,
Almaday aǵarıp pisken baǵdaǵı.
Mıyıq tartıp kúlseń toqsan jaz bolar,
Ilayım sol kúlkiń toqtatılmasa,
Lawlap jalınlaǵan jalın az bolar,
Albırt júregime shoq atılmasa.
Meniń ór kewilim berilmes edi,
Izińnen kóz tigip telmirmes edim.
Láylidey sen bunsha súyilmes ediń,
Al men de ıshqıǵa jeńdirmes edim.
Jeńdi muhabbatım, berildim saǵan,
Aya ya ayama ipsap ózińde,
Nishterdey kóz nurıń qadaldı maǵan.
Júregińe jol tapsam dep jalmajan,
Aldıńa ákelip koydım tilekti,
Ne juwap berseń de, tez ber Milajan!