Men xalıqtıń soldatı (Qayıpnazarov)
Men - xalıqtıń soldatı, talabım tawday,
Tasıǵan ǵayratım tawdı jıqqanday,
Qanǵa qumar fashistlerdiń toparın,
Tobı menen tereń górge tıqqanday.
Toldım kúshke, óstim, ele ósemen,
Tepsem tastı ezip, temir územen,
Tisin qayrap ózi tiyse dushpandı,
Tabanda jer menen jeksen etemen.
Baǵı pisip, gúl ashılǵan jerime,
Bayraǵı berik ullı paytaxt elime,
Tiygen jawdı qanı qızıp qutırıp,
Jiberemen qaytıp kelmes jerine.
Maqtanbayman, isenemen kúshime,
Saat sayın alǵa basqan isime,
Mendey neshe qıranı bar elimniń,
Bmrligi nıq Watan qorǵaw isine.