Lo segond comte de Foix (Roger Ier)
Mossen Roger foc lo segond comte de Foix, fil de Mossen Bernard et de Madona Beatrix de Bezes, foc marit de Madona Arsenda et foc feyt comte de Foix l'an mil XCVI, regnan lo premier rey Phelip, rey de Fransa; et foc notable cavalier, valen et ardit, conquestec Carcassonna et apres restituec lo comtat de Carcassonna à Madona Mengard, vescomtessa de Bezes, sa cosina germana, et à Bernard Ato son fil. Et fen pactes que, sy demoressan sens enfans de leyal matrimoni, Mossen Roger laissaria à Madona Mengard, sa cosina, vescomtessa de Bezes et à Bernard Ato, son fil, aprop sa mort, Foix, Fredelas qu'es jos lo castel de Pamias, Lordat, Castel Penent, lo castel de Du, lo castel de Mirapeys, et las honors que avia en lo comtat de Comenge et en Cozerans, exceptat so que ja era siu en lo pays de Carcasses, Arsens et Layrac, Fontia, ab lors terminis à la carta contenguts, que demoressan al dit Mossen Roger, per ne fa sas volentats; aussy ben demores lo vescomtat de Bezes à Mossen Roger, comte de Foix, ab lo comtat de Carcassonna. Asso foc feyt XX kalendas de may, l'an mil XCVII.
Aqueste Mossen Roger, comte de Foix, fec translatar lo cos de Mosseignor Sant Antony de Lezat et portec los osses en son mantel, el meteys, devan touta la processio ecclesiastiqual, al monastier de Lezat. Et apres, en l'an mil CXI, en la quarta feria de genier, fec translatar lo cos de Sant Volzia, que repausava prop del castel de Foix; on foren Mossen Amiel, avesque de Tholosa, Mossen Ramon, avesque de Barbasta, Mossen Roger, comte de Foix, et tropes autres del pays, clercs et capellas et infinidas gens de longas terras et proensas, et ab gran gauch et ab gran gloria. Et, per la gracia et espiracio de Diu, agut coseilh, apres porten las reliquas ab gran gloria à la gleisa de Montgausy, on fec infinits miragles, entre altres, quand lo pausen à la peyra bolthorar, un home que era orb et contreict, passec dejos lo cos sant, crobec la besio et la sanitat del cos. Diverses autres orbs, paleficats et endemoniats croben la sanitat, cum plus à ple es contengut en la siua legenda. Et apres, à la nouvela basiliqua en la prop la gleisa de Foix, que era fondada en la honor del glorios Sant Nazary, honorablemen foc repausat et colloquat. Et Mossen Roger et dona Arsenda, sa molher, donen à Sant Volzia la villa de Ganac ab (certs) cazals de Amplaing.
Et aguec un fil de Madona Arsenda, que se appelec Roger; et aqueste bon comte foc à la presa de la ciutat de Jerusalem, moric l'an mil CXI, et foc comte quinze ans.