lipu kule/omekapo

by kala pona Tonyu

ken la, sina lon kulupu 'ma pona pi toki pona' la, sina kute mute e ni lon toki uta: 'omekapo!' taso sina sona ala sona e kon pi nimi ni? sina sona la, sina sona ala sona e tan, e kama lon pi nimi ni?

sina sona ala la, toki ni li ken pana e sona.

tenpo pini mute mute la, jan mute pi toki pona li kama lon kulupu lon ma Teka (Texas). ona mute li moku e kala lete, li musi, li toki pona. jan Sonja (mama pi toki pona) en jan Maliku (jan lon ma pona pi toki pona) li lon ni. jan Maliku li pana e lipu pu ona tawa jan Sonja. jan Sonja li sitelen lon ona.

sitelen pi jan Sonja li ni: 'jan Maliku o! sina mije pona. ale li pona. o moku e kala pona. Sonja :)'

tenpo mute la, sitelen ni li suli ala.

tenpo li tawa. suno wan la, toki uta li lon ma pona pi toki pona. jan pi mute ala li lon toki uta ni; jan Maliku en jan ante lili li lon. ona mute li toki musi, li toki e ijo ale, li toki e kama kulupu pi tenpo pini lon ma Teka.

ni la, jan Maliku li kama lukin sin e sitelen pi jan Sonja lon pu ona. ona li pana e sitelen ni tawa jan mute lon toki uta.

'o moku e kala pona?' jan li sona ala e tan pi sitelen ni. ni la, ona li musi e nimi. 'ona li ken sama 'tawa pona', anu seme? a a!'

'ni li ken!' jan ante li musi kin. 'ken la ona li ken kama nimi sin.'

'o moku e kala pona!'

jan Maliku li kama sona e sona pona. 'a, ken la jan li ken lili e ona tawa 'o.m.e.ka.po', sama 'o moku e kala pona'.'

jan mute la, ni li pona mute. ona li open kepeken nimi ni.

'omekapo!' toki uta li pini la, ona mute li toki e ni. 'omekapo!'

ona mute li kepeken mute e nimi ni tawa toki ale, li pana e ona tawa tomo #sona-musi. tan ni la, jan mute kin li kama kepeken ona. jan lawa li kepeken ona. tenpo la, jan Sonja, mama pi toki pona, kin li kepeken ona.

tenpo mute la, jan Maliku li toki mute ala lon ma pona pi toki pona. taso nimi ona 'omekapo' li awen lon, li pona tawa jan mute, li kama lon lipu 'nimi ale pona'.

pona a! tenpo ni la, sina sona e kama lon pi nimi 'omekapo'. kon ona li awen sama tenpo pini - ona li sama 'tawa pona!' li sama 'o awen pona!' li ken sama 'o awen pona lon weka sina'. ona li ken kon mute.

ni la, tenpo kama la, ken la o toki ala e 'tawa pona' tawa jan pona sina. o toki e 'omekapo!'