Lifanunods tidelas volapüka. Müller Karl Friedrich
Pemotom in yel 1846, velul 5., in Justingen lä Münsingen su Alb in Vürtän. Evisitom popajuli yelis vel in Justingen, poso gümnadi in Ehingen yelis bal e lafik. In yel 1862 enütlidom as lenadäb lä fat lelöfik oma, vunasanal plagik, kö ebinom yels tel. Täno ekömom ali Untertürkheim lä Kanstatt yela foldils kil as yufan vunasanelik, de is ali dl. Renz Th. W., sanel plagik in Ehingen, nuik kutakonsälel klänik lepestimöl e banasanel regik dl. de Renz in Wildbad, al sekulivön oki as vunasanel.
Poso ekömom ali Biberach, kö esekulivom oki in madädöp usik öned sanel plagik dl. Martini.
In yel 1867 evedom solat ed edünom jü al yel 1871, zülul 25., as disasanel in yaganabatan kilid regik in Wiblingen ed in Ulm. In folul yela 1869 emekom xämi as vunasanel in Stuttgart ko sek gudik. Poso evisitom niveri in Tübingen ed estudom isit motöfavi. Lulul 21. e 22. yela 1872 emekom xämi as yufaman in Stuttgart i ko sek gudik. Täno elomom in Granheim lä Ehingen as vunasanel e yufaman, ed ematom velul 25. yela öt. In yel 1876, balsul 19., efezugom ko famül omik ali Dächingen lä Ehingen len Danub, kö nog lödom ko vom e cils mäl.
Evedom pesevik ko volapük folul yela 1883 dubü delabled de Ulm, in kel elilädom vüdi len flens vpa al lasam sembal; laltüg at enitedom levemo omi, epenom suno calablode (Kniele) omik, al sedön pläni blefik ome dö pük de Schleyer. Söl Kniele epotom pevipölosi ome. Foviko ebeginom dulilädön zülagis, vpabledis e glamati blefik, elemom glamati segivama telid ed ebeginom nu studi vpa, kel evedom lesuno jäfam tikälik löfikün ome in libadüps oka.
In tim leblefik ya epenom volapükiko söle datuval, i söle Kniele e volapükanes votik. In yel 1883, velul 24., ägetom dipedi as tidel vpa, in yel öt balsetelul lulid estabom vpaklubi in Dächingen, nebaklubi kilid, keli enemom »Volapükaklub de Alb«. Dipedi as löpatidel vpa egetom 1887, kilul 15.
Al plägön oki in vp. aispodom ko volapükans in ninlän e selän, elovepolom kanitemis za folselul, de kels emaniföfom mödikumis in »Volapükaklubs«, fovo elovepolom 1886 se Lessing lügapledi in süfas[1] jöl »Philotas« (Filotas) in vpi, keli eninsedom söle Herold in München al menodam; fovo epenom nemödikosi in bled de München «Cogabled vpa«.
Al pakön vpi eplafom ni töbi, ni moni e no oplafom otis i füdo. — Ünä olegivom Lemekal lifi ome oiblibom züpel zilik vpa ed oilestimom datuveli öta.
- ↑ Bükapök pla el süfs.
Se Mulapenäd nebolitik: Volapükagased 1888, Nüm: 8, Pads: 46–47.