Lifanunods tidelas volapüka. Jong F. K. D.
Pemotob in yel 1862. Binob bevü balidans in Nedän, kels egetoms dipedi as tidel vpa fa datuval. Istudob ya pükis zül, ab estudob noniki so gäliko, äs volapüki. Nag estudob te pozendel bal glamati volapüka, epenob medü vödabuk penedi lonedik söle Schleyer. Pos vigs tel espodob ed epükob nefikuliko püki at. No kanon tuvön züpelis mödik in pags: in Drüten elabob züpelis kil ed in Dreumel te bali. Binob egelo zilik tefü pakam vpa, pükob egelo e valöpo dö at. Epenob ofeno volapükiko lödanes länas votik, as sam Peruäna e Lenidäna nedänik. Volapükans länas valik penomsös ofeno balims votimes tefü dinäds zidöl plo pakam vpa e pük at binomös pük löfa talanes valik. Vio älöfoböv spodön ko tidel sembal in Silop, Fikop e Talop e l. Penolsös obe!
Se Mulapenäd nebolitik: Volapükagased 1889, Nüm: 2, Pads: 10.