Lifanunods tidelas volapüka. Dl. Wolf Karl
Pemotob in München 1829, balsul 8.; estudob in gümnad de Freising ed in niver de München (1840—1852). Pos plag yusitanik, e pos calam de yels anik as konsälal magita pedanemob (ma lons vönik) as lavogal in Pfarrkirchen, 1865.
In yel 1883, zülul, elilädob laltügi dö vp. in »Augsburger Abendzeitung«. Egetöl literati vpik ävöbob dipedi tidela vpa in yel 1883, balsebalul 20.
Ekanob dagetön züpanis te kil u fol in smazif isik. In flolatim yela 1884 esedob literati vpik flene obik in Florenz al seivam e pakam. Söl at, tälan, egivon pükapenädis i padale Curvi, tiemo lödöl us, kel, seval mäkabik pükas, äläsevom ko nited e milagam siämöfi datuva söla Schleyer; ab ädotom tefü lefulamöf döla at. Söl Curvi äsedom obe as kolgivi, vobuki nulikün omik «Il Vaticano regio«. No enedunob i sedön in tim öt literati säkik söle vemo klatik in München, vöno plofed oba in gümnad, kel ikälom ziliko löfi pükas lä julans omik. Vemo gälöl oki dö med somik pos yels ti fols, söl at lestimlik äpenom obe, das demü bäled no kanom it plägön dini, ye das ogivom pöpis ko komed vamik flenes steifik oma.
Se Mulapenäd nebolitik: Volapükagased 1888, Nüm: 9, Pads: 53.