Le Bracun y chël da Coz
Le Bracun y chël da Coz
Le Bracun da Brach da La Pli de Marou
conesciü da düc y dant y do
- ci lotrun ch' al fô y gran malandrët! -,
vëgn sö dai Pontac vers Col Maladët.
Chël signur da Coz ia San Linert
cola chestiana dl Brach á albü n bastert;
y por chësc la pelicia i oressel cuncé.
Sö dal ost da Corvara él sigü de le ciaté.
Al n' á bria d' aspeté cun sü lotri alalungia;
ai s' infilza düc canc un al ater bel dlungia.
Ai sfodra rabiusc sciöche le diau sëgn les sables,
se tira de barest surafora ales sciables.
Le Pontac da Coz á la lancia tres fora
y dant y do i vá le sanch en malora.
Al mör, mo tla bega al ne sënt ch' al é mort,
mo scraia y comana y se para tres fort.
Y insciö alalungia l' essel ël desmenada,
ne i essel le Bracun scrit na lëtra por strada
ch' ess dit fora di dënz bel tler a scior Tita
che al sides mort bele plü ores, che al ne sides plü en vita.
Y spo ch' al â lit chëra burta scritöra,
bëgn i éra passada de fá vera indertöra.
Al sënt che al é mort y toma söl cü:
morvëia tan grana ne unse mai odü!