La mia donnetta

by Rosa Massara de Capitani

La prima volta che mi hoo vist la Nina
La someiava tutta a on angiolin,
Cont qui bej œuc celest de innocentina,
E qui cavej che hoo creduu d'or fin.

E quand nun sèmm sposaa? − Quella mattina
Volzava squasi nanca stagh vesin....
La me pareva ona madonnina,
Sott al vell bianch istess del sò faccin.

Ma quand la vedi adess tutta contenta,
Vardà el bagaj che rid sui sò genœuc,
Slongand i sò manitt, cercand la tètta,

Cara, soo minga div quel che me senta!....
Che angioj, che madonn denanz ai œucc!....
L'è mej anmò, cent volt la mia donnètta.