La donna
La donna
Benedetta - la donnetta
tutta amor per el marì,
che la cred - in bòna fed,
senza mai trovà de dì!
Benedetta - la donnetta
tutta coeur per la soa cà,
che la tend - ai sò faccend,
senza cred de lavora!
Per on òmm l'è on gran confòrt
ona dònna de sta sòrt!
Nò gh'è òr - per sto tesòr!
L'è on regall che fa 'l Signor!
Ma la dònna - brontolònna,
la bigòtta, la sabetta,
la gelosa - l'ambiziosa...
Maladetta!...Maladetta!...
L'òmm pù trist, - rispett a quist,
l'è ona pasta de bombon!
Anzi quist - fan vegnì trist
finna l'òmm el pussee bon!
Guardee ben! L'è mej la mòrt
che ona dònna de sta sòrt!
In sto fòss - pien de dolor,
l'è 'l pù gròss - che dà 'l Signor!