La Roda
La Roda.
1.
Fira, fira, möta, fira,
Fá che la roda vais morjel,
Stopa scassa, tëi destira,
Sö cun lana n bel panjel!
Oh bel bal, tö te veles valʼ,
Roda snel, roda snel!
Oh bel bal, tö te veles valʼ,
Roda snel, che le fi vëgnes bel.
2.
Dër insciö tüa vita roda
Ligra en ciasa, dlijia y ciamp;
Mo gonot aflita y scioda
Dlunʼ firan ca bel so tëmp.
Oh bel bal, tö te veles valʼ,
Roda snel, roda snel
Oh bel bal, tö te veles valʼ,
Roda snel, che le tëmp vá snel.
3.
Roda, roda, möta, mëna,
Le tëi sʼ intorj, y le fi crësc lunch,
Le spö vëgn gros, le panjel stá apëna,
Döt se möi, ah, vita él dlunch.
pagina:98
O bel bal, tö te veles valʼ,
Roda snel, roda snel,
O bel bal, tö te veles valʼ,
Roda snel, che le fi vëgnes bel.
4.
Laora, süia, roda y salta,
Lunch se fira le tëmp mo snel,
Operes beles fá a mira alta,
Dl vire é prësc firé le panjel.
O bel bal, tö te veles valʼ,
Roda bel, roda bel,
O bel bal, tö te veles valʼ,
Roda bel, che le vire vá snel.
5.
Vá la roda, lʼ aspo é en moto,
Spo le puntin se möi por ordí,
Mans y pîsc y spola á noto
Drap, bel guant por trá dal fi.
O bel bal, tö te veles valʼ,
Roda snel, roda snel,
O bel bal, tö te veles valʼ,
Roda snel, che le drap vëgnes bel.
6.
Prësc tüa vita sará firada,
Fira, o fira n bel fi dʼ or;
Tëra ordësc de virtú indorada,
De perles por guant en cil dʼ onur.
O bel bal, tö te veles valʼ,
Roda snel, roda snel,
O bel bal, tö te veles valʼ,
Roda snel, che le guant vëgnes bel.