La Mèrica nœuva
Ferdinando Fontana (1850-1901)
La "Mèrica" nœuva
Sto veridich, autentich accident,
che adess ve contaroo, l'è capitaa
in dâta sedes Marz, el mes di vent,
in d'on paes, dove i viran doveven,
in termin de on quaj dì, andà emigraa
in Mèrica squass tucc
per la troppa bondanza ghe godeven!
El Prevost, disend messa ona mattina,
el gà avuu... on'esigenza repentina
e posterior, che ha faa colp sui devott;
i quaj, trovand el fatto eccezional,
han vorruu giugà al lott
on terno tal e qual:
cipè, sedes, trentaduu e quarantott!
Numer simbolich, come ognun capiss
per indicà quajcoss de badïal!
O Franklin, Smiles, Pandolfini!..., O lista
dei mila economista e moralista,
andee a fass vong!... Coss'el var a sgobbà,
quand se gâ el lott de comod, e se gà
di Prevost... oculaa,
che ve dà i numer bon?!
Perchè, la conclusion
l'è stada: che tucc quanti han guadagnaa
ona motta de ghèj: e hin restaa a cà,
disend, che, adess la Mèrica
la de avè cambiaa post,
e che l'è andada a stà in corp di Prevost!