La Fera di fior
Giuseppe Elena (1801-1867)
La Fera di fior
In Porta Verzellina, sul Liron
el dì de San Francesch se vend i fior
e cento milla erbett, che sa d'odor,
in vas de tucc i forma e dimension.
Bagaj, che ghe fee attorna de lizzon,
quij che vedii cont i pu bei color,
guardee che g'han l'arsenich per umor...
v'el disi, e ve ne porti la reson.
On amis, che cognossi de vesin,
(de pasta tanto dolza e tanto bonna,
che poss minga lassà de vorègh ben)
in del tœu fœura on fior in d'on giardin,
l'ha portaa a casa on vas de Bella-donna...
pover amis! L'ha portaa a cà el velen!