La .alis. cizra je cinri zukte vi le selmacygu'e/paremo'o

by Lewis Caroll

i lu mi zvati sei la alis krixa li'u i abu ze'i tolmorji le du'u abu ba'o banro lo mokau barda ze'a le puzi mentu be li so'u i abu tai sutra plipe ja'e le nu falgau le pairkamni tsina sepi'o le skaci korbi gi'e renro ro le pairkamnycmi lei stedu be le cnita premei i lei pairkamnycmi cu kalsa preja i la'e di'u morjygau la alis fi lo nu abu se snuti le nu falgau lo slofi'e tanxe ca le purlamjeftu

i lu u'u i e'osai ko mi fraxu sei abu dunku tonga ki'asku li'u i abu co'a crepu lei pairkamnycmi le loldi rai le ka sutra kei ki'u le nu le slofi'e snuti za'o stali le abu menli i abu tolsatci te sidbo fi le du'u ga ze'i ei crepu gi'e punji py le pairkamni tsina gi py ba mrobi'o

i lu le nunpai na ka'e di'a fasnu sei la noltrunau cu junri mutce voksa cusku pu le nu ro le pairkamnycmi cu xruti le drani selzva i ba'e ro sei ny rere'u basna mutce cusku li'u i ny catlu la alis ca le nu cusku

i la alis catlu le pairkamni tsina gi'e viska le nu abu pu punji seja'e le nu sutra kei le rebyrespa ja'e le nu le ry stedu cu cnita i le se kecti cu sligau le rebla tai lo nu tolgei kei gi'e ka'enaisai muvdu i abu boi ry bargau gi'e drani punji i lu na mutce le ka vajni sei abu sezysku i pe'i le fatne le se fatne cu dunli le ka makau prali le nunpai ce'u li'u

i le pairkamni ca le nu ge py ba'oru'e xruti fi le jenca po'u le nu se dicra gi ro le tanbo e ro le pinsi cu se tolcirko gi'e se dunda fi py cu co'a tolylazni ciska lo lisri be le fasnu i go'i fa ro boi py po'u na'e bo le rebyrespa noi simlu le ka dukse le ka se sfasa kei le nu zukte lo drata be le nu kalri moklu zutse gi'e gapru catlu le drudi be le kumfa

i lu do ma djuno le cuntu sei la noltrunau fi la alis cusku li'u

i lu noda sei la alis cusku li'u

i lu xu nosai da sei la noltrunau cu za'o co'e li'u

i lu nosai da sei la alis cu cusku li'u

i lu la'e di'u cu mutce le ka vajni sei la noltrunau fa'a le pairkamni cu cusku li'u i py co'a ciska di'u le tanbo ca le nu la blabi ractu cu zunti i lu li'a zo tolvajni cu se skudji do doi nolba'i sei ry sinma mutce tonga cusku li'u i ku'i ry frumu gi'e flira snigau ca le nu tavla

i lu li'a mi skudji zo tolvajni sei la noltrunau cu sutra cusku li'u i ny ca'o tolylau sezysku lu vajni i tolvajni i tolvajni i vajni li'u tai le nu cipra le ka makau pe ce'u xagmau kei lei valsi

i so'o le pairkamnycmi cu ciska zo vajni i so'o boi py zo tolvajni i la alis ka'e viska ki'u le nu jibni co banzu le nu catlu lei py tanbo i lu ku'i nasai vajni sei abu pensi sezysku li'u

i caku la noltrunau noi pu ze'a zukte ciska fi le ny notci cukta cu cusku lu ei smaji li'u gi'e bacru tcidu fi cy fe lu le voremoi javni zo'u ro prenu poi galtu minli li za'upa cu bilga le nu cliva le kumfa li'u

i roda catlu la alis

i lu mi na galtu minli li pa sei la alis cusku li'u

i lu do go'i sei la noltrunau cu cusku li'u

i lu go'i li ji'ire sei la noltruni'u cu jmina li'u

i lu iseju ainai mi cliva sei la alis cusku iji'a jy na fadni javni i do jy cazi finti li'u

i lu jy tolcitrai lei javni pe le cukta sei la noltrunau cu cusku li'u

i lu ganai go'i gi ei jy pamoi sei la alis cusku li'u

i la noltrunau cu labybi'o gi'e sutra polje le notci cukta i lu ko pensi le do se paijdi sei la noltrunau fi le pairkamni cu lauble je desku voksa cusku li'u

i lu lo drata datni za'o ba se jarco pe'u doi nolba'i sei la blabi ractu noi sutra plipe cu cusku i le vi pelji puzi se cpacu li'u

i lu ma se ciska fi ta sei la noltruni'u cu cusku li'u

i lu mi ti za'o na kargau sei la blabi ractu cu cusku i ku'i ti simlu le ka xatra fi le pinfu fe y da li'u

i lu ju'o go'i sei la noltrunau cu cusku ijonai ti xatra lo no da i ku'i ka'u la'e di'u rirci li'u

i lu ma se judri sei pa le pairkamnycmi cu cusku li'u

i lu nasai se judri sei la blabi ractu cu cusku i je'u no da se ciska fi le bartu li'u i ry tolplo le pelji ca le nu tavla kei gi'e jmina lu pa'e ti na xatra i ti penpau selcmi li'u

i lu xu le ciska tarmi cu me le pinfu moi sei lo drata pairkamnycmi cu te preti li'u

i lu na go'i sei la blabi ractu cu cusku i la'e di'u cu traji le ka cizra li'u to ro le pairkamnycmi cu simlu le ka se cfipu toi

i lu ja'o py fukygau ta le ciska tarmi pe lo drata sei la noltrunau cu cusku li'u to ro le pairkamnycmi cu xruti le ka cikygei toi

i lu pe'u doi nolba'i sei la nolse'u cu cusku mi tu na ciska i ji'a no da ka'e je'urja'o le du'u mi ja'a go'i i no cmene cu zvati le fanmo be tu li'u

i lu le cuntu cu xlaze'a va'o le nu do na ciska le do cmene sei la noltrunau cu cusku i ba'e ju'o do zukte fi le nu palci ibo do romu'ei le du'u na go'i cu ja'a pu ciska le do cmene tai tu'a lo'e stace li'u

i kampu fa le nu xanvruzau la'e di'u noi pamoi co tolbebna selsku la noltrunau ca le cabdei

i lu la'e di'u cu jetyja'o le du'u ta zerzu'e sei la noltruni'o cu cusku li'u

i lu la'e di'u cu jetyja'o noda poi simsa sei la alis cusku i ua do na djuno ji'asai le du'u makau se ciska li'u

i lu ko tcidu sei la noltrunau cu cusku li'u

i la blabi ractu co'a dasni le vistci i lu ei mi go'i co'a ma pe'u doi nolba'i sei ry retysku li'u

i lu co'a le krasi sei la noltrunau cu junri cusku ko ca'o go'i co'u le fanmo ibabo ko sisti li'u

i di'e penmi co se tcidu la blabi ractu

              i ti'e do ta vitke ca'a
                i do tu tavla mi
              i cu'u ta ge mi preza'a
                ginai mi limna di

              i cu'u tu mi pu vi sanli
                to mi'o djuno toi
              i ganai ta za za'o lanli
                gi ma do dimna oi

              i dunda fa mi pa da ta
                i go'i re da tu
              i do se xruti le ro da
                noi me mi moi za pu

              i ga nai ga mi gi ta iu
                 se cuntu le vi fasnu
              gi ia tu lacri do le nu
                 do zifre xruti gasnu

              i pe'i do pu le nu tcini
                 le nu se fengu ta
              cu fanta zunti gi'e jbini
                 uo tu joi mi joi ra

              i tu na djuno ei gau ko
                le du'u ta ru zmanei
              i ei se mipri mi joi do
                ro drata le nu ca nei

i lu la'e di'u cu vajrai lei datni poi se tirna ca le cabdei sei la noltrunau noi simymosra lei xance cu cusku i seki'ubo ei le pairkanmi li'o li'u

i lu mi va'o le nu py di'u ka'e ciksi sei la alis cusku to abu banro lo tai barda ze'a le puzi mentu be li so'u ja'e le nu abu nasai terpa le nu zunti ny toi cu dunda lo rupnu py i ba'e mi na jinvi le du'u lo smuni selci ji'asai cu zvati di'u li'u

i ro le pairkamnycmi cu ciska fi le tanbo fe lu ba'e ta na jinvi le du'u lo smuni selci ji'asai cu zvati di'u li'u gi'enai ku'i troci le nu ciksi le pelji

i lu le nu noda smuni di'u sei la noltrunau cu cusku cu fanta lo barda raktu ki'u le nu einai mi'a troci le nu facki lo smuni i ku'i ju'ocu'i sei ny noi ke'a lei penpau cu pejgau le cidni gi'e catlu sepi'o pa kanla cu di'a cusku i pe'i mi viska lo smuni i lo'u ginai mi limna di li'u i ju'i do'u je'upei do ka'enai limna di sei ny fa'a la nolse'u cu jmina li'u

i la nolse'u cu badri daskygau le stedu i lu xu mi simlu le ka ka'e go'i sei ny cusku li'u to ju'osai ny noi marji lo jarple cu na simlu toi

i lu i'e sei la noltrunau cu cusku li'u i ny di'a tolylau bacru lei penpau i lu lu to mi'o djuno toi li'u mapti li'a le pairkamni i lu i dunda fa mi pa da ta i go'i re da tu li'u i ua ju'o la'e di'u nu ta fairgau lei rutytisna li'u

i lu ku'i di'a co'e lu i do se xruti le ro da li'u sei la alis cusku li'u

i lu ua ry zvati ta sei la noltrunau noi jarco lei rutytisna noi cpana le jubme cu jinga cusku i noda ka'e klimau la'e di'u i ku'i lu pu le nu tcini le nu se fengu ta li'u i do noroi fengu doi dirba pe'i je'upei sei ny fi la noltruni'u cu cusku li'u

i lu noroi sei la noltruni'u cu fengu mutce cusku li'u i ny renro lo xinmo vasru le rebyrespa ca le nu tavla i to la bil uu pu de'a ciska fi le tanbo lo degji imu'ibo dy na mornygau i ku'i by cazi di'a co'e sepi'o le xinmo noi carvi le by flira ku'o ze'a le nu xy renvi toi

i lu seki'ubo lei valsi do na mapti sei la noltrunau cu cusku li'u i ny cisma catlu le sruri i morsi smaji

i lu mi pu vlakei sei la noltrunau cu jgicro tonga jmina li'u i roda cmila i lu e'i le pairkamni cu pensi le se paijdi sei la noltrunau ji'irenore'u le djedi cu cusku li'u

i lu na go'i i na go'i sei la noltruni'u cu cusku i le se sfami'e cu pamoi i le se paijdi cu za'umoi li'u

i lu bebna je nonselsmu sei la alis cladu cusku i ionai oi pamoi fa le se sfami'e li'u

i lu ko ri'urgau le do tance sei la noltruni'u noi zirpu binxo cu cusku li'u

i lu ai mi na go'i sei la alis cu cusku li'u

i lu ko le stedu ta vimcu sei la noltruni'u cu voksa launrai krixa li'u i no da muvdu

i lu ma do terpa sei la alis noi ca ba'o banro le abu ta'e barda cu cusku i ga'i do na'e drata lo kardymei li'u

i caku le karda romei cu tolfarlu le vacri gi'ebabo farlu la alis i abu milxe krixa ri'a lo nunterpa zu'u e lo nunfengu zu'unai gi'e troci le nu rivbi ky i abu facki le du'u abu vreta le rirxe korbi fau le stedu cu cpana le galtupcra be le mensi noi xendo vimcu loi morsi pezli noi ba'o farlu le abu flira lei tricu

i lu ko cikna doi alis doi dirba sei le mensi cu cusku i ue do ze'u sipna li'u

i lu u'e mi senva lo tai cizra sei la alis cusku li'u i abu tavla le mensi ro le cizra se lifri poi do ke'a puzi ca'o tcidu i le mensi ca le nu mo'u go'i cu cinba abu gi'e cusku lu je'u ju'o cizra se senva doi dirba i ku'i ko ca bajra klama tu'a le tcati i ca'o lerci binxo li'u i la alis sa'irbi'o gi'e bajra gi'ecabo pensi le du'u le se senva cu se manci kei pa'e

i ku'i le mensi cu zutse za'o le nu abu cliva kei gi'e vregau le stedu le xance gi'e catlu le nu le solri cu farlu kei gi'e pensi le cmalu no'u la alis ge'u e ro le abu se manci se lifri i le mensi ji'a co'a senva sa'enai i senva la'e di'e

i pamai my senva la alis i lei abu cmalu xance cu za'ure'u ca'o jgari le my cidni i lei abu carmi selci'i kanla cu catlu lei me my moi i my ka'e tirna le satci tonga be fi le abu voksa gi'e viska le cizra nu stedu desku noi se rinju le kerfa le nu gacri lei kanla i ca le nu my tirna gi'a simlu le ka tirna cu jmive binxo ru'usai my fa lei cizra tigni be le se senva be le my cmalu mensi

i le clani srasu cu vruvricypra bu'u lei my jamfu ca le nu la blabi ractu cu sutra klama i la smacu noi terpa cu jacre'o pagre le jibni la'ucma i my tirna le sance be lei tcati kabri ca le nu la cibmasti cicyractu cu kansa lei cycy pendo le ze'e nu sanmi i le cpina voksa be la noltruni'u cu minde fi le nu lei ny malselfu'a vitke cu se catra i le xarju cifnu cu za'ure'u senci ga'ure'o le cidni be la noltroni'u ca le nu loi palta ku joi loi palne cu sruri porpi i za'ure'uku le selkrixa be la cpicinfo le snamli be le tanbo pinsi pe le rebyrespa le se zunva'u be lei smacrkobaiu zo'u le romei cu se tisna le vacri gi'e jorne le darno kaksna be la tolgeitce ke jitfa cakyrespa

i my za'o zutse to lei kanla cu ganlo toi gi'e xadba krici le du'u my zvati la selmacygu'e iku'i my djuno le du'u le nu kargau ky cu banzu le nu roda binxo lo'e tolzdi fatci i le srasu cu vruvricypra gau le brife i le la'ucma cu se boxna gau lei jauspa i le sance be lei tcati kabri cu binxo le se lanjanbe i le cpina se krixa be la noltruni'u cu binxo le voksa be le lankurji nanla i le nunsenci be le cifnu le selkrixa be la cpicinfo ro le drata ke cizra savru zo'u le romei cu binxo sei my djuno le mixre sance be le zukcfu cange i le se cmoni be lei zu bakni cu basti lei tilju kaksna be la jitfa cakyrespa

i romai my se xanri le nu le my cmalu mensi ca le balvi cu makcu ninmu gi'e ralte ze'a lei makcu nanca le sampu je prami risna pe le vercedra gi'e jajgau le cymy cmalu panzi gi'e gasnu le nu lei ba'e py kanla cu carmi se cinri so'i cizra lisri e ju'ocu'i ji'asai le se senva pe la puzu selmacygu'e kei gi'e cinkansa py lei py sampu se tolgei gi'e se pluka lei py sampu se gleki gi'e morji le cymy verba nunji'e e lei selgei ke crisa djedi

                                    fa'o