L'ortolaninna

by Rosa Massara de Capitani

Gh'è chi la bella bionda
Del pont de porta Cinna:
Gh'è chi l'ortolaninna,
Donnett, chi vœur comprà?

Gh'hoo fior de roba bonna
Apènna adess cattada:
La brilla la rosada
Suj erborinn anmò.

De seller, de carotol,
Ghe n'è de fà cuccagna;
L'è piènna la cavagna,
Nagott ve calarà.

Gh'hoo poor, erbett, e broccol
Ravett, scigoll, ajœu,
Erbion, basciann, fasœu,
Verzitt, spinazz, zucchet.

Guardee che insalatinna!
Gh'è chi la primavera:
Scionsgin e scolcionera,
Zuccoria e lattughin.

E sti articiocch? Che manna!
Vardee che pomidori!
O che patati, sciori,
De mej s'en mangia no.

Andemm, donnett, avanti,
L'è pronta la stadera,
E giusta, neh, sincera,
Giusta compagn de mì.

Gh'è chi la bella bionda
Del pont de porta Cinna:
Gh'è chi l'ortolaninna,
Donnett, chi vœur comprà?