L' Bal de les Strîs
Lʼ Bal de les Strîs.
Gnidʼ, compagnes, le bal é bel!
Döt pinsier lascede sëgn!
I omi dorm ëi le sonn morjel,
Nʼ aedʼ fistide, ëi stá dër bëgn!
Aló, adöm les mans, dër strënt
Piet a piet y brac a brac!
Sö cun le pe, spo sciöche le vënt
Ia por chisc bi bosć da Triac!
Gnidʼ, compagnes, le bal é sann!
Jöbia él incö, nosc de!
Cez chʼ orun döt unsʼ debann,
Ci ater mai ves dessi dí?
Cez chʼ orun döt bëre podunsʼ:
Vin, café tan fosch co blanch,
O ince magari de bugn pauruns,
Roba sana a vigni stanch.
Gnidʼ, compagnes, le bal é sann!
Plënes de füria alzede i pîsc!
Dandaldöt ponsede al dann
Chʼ un da fá por vigni prisc!
Cez chʼ orun mangé podunsʼ:
Rost de morc, de fossa tuc,
Cern morjela de mituns,
Morc bi jogn y inozënt düc.
Gnide, stries, che le bal é cört!
Gode orunsʼ chësc tëmp ciamó;
Do la mort nes toca le burt,
Donca profitundʼ chiló!
Alc i pîsc, rodedʼ bel snel!
Lʼ alba vëgn a nes ciacé;
Sö, toledʼ ciamó lʼ agnel,
Strangorelʼ tratan le balé!
Le sanch sî spo ciucé bel döt!
Do le ciavunsʼ te n büsc ciantan!
Frat da fá strionëc sîl tut!
Basc i pîsc, aldidʼ sonan!