Kongef famülik konöma domik
Lä jols jönik fluma Turia kel vatom dub vatabundan omik (nemödik hitatimo), glünedi bujadik zifa lejönik e poedik Valencia del Cid, äkolkömoms in velul lätik flens anik al zelön kledazäli folsid sembala de oms, e al pükatön tefü pakam dustodas nulik, al mödön valiks monabundani, i nemödik (hitatimo e nifatimo), pejaföl dub vobad snatik, ä plo dustodel, ä plo calel nolik.
Ni spatön in lemalitöp pestitöl in Alameda (fotaspatöp), ni lenlogedön boadaledomis pebumöl fa sogs lepatikün, ni zäls kels legäloms omis, pato du neits, ni läds mödik de Valencia dub lejön ofsik; ni visits lä stits kanik, nolik, dustodik lezifa, äkanoms fagön tikäli tüdelas de döl sölöl fäni omik. E äsif döl at veibom-la in lutöp, sölöl tikäli valikas, flens votik kömöl al visitön omis, ämoboms yegi de lifameds in famül, kelos pämotos ployegi de lasamön lasamili, keli yelafolsik älasamom in foms suköl:
«S. l....
In tims nuik du kels pükon so mödo e tikon so nemödo, e plagon ailuumo, sibinos neläb materik kel mozugom obis umo ka neläbs valik bida ot.
Sogaklad dukötik paipönom üno in din at äsliko in dins votik: mütöl klotön guni äs sogaklads geilik, labom te lemesedi utas onedikün. Zesüdos k"tön disodili guna, mödön lemesedis, u sükön medis al spälön dub lemeseds nuik.
Yegs at binoms uts postudöl me bepükam takedik del 27 velula in dom oba, kel lofob ole.
Begob oli mekön sis lenu studis e notedilis tefü döls olik dö yeg at, e binön plisenik kuladiko düp mälid pozendelo, binöl pesuadöl das no sükon püköfi, sod plösenami teik e balik leceda olik tefü yeg so veütik, al dagetön kludis pöfüdik e plagik.
d.o.
J. G. H.»
Äkolkömoms kuladiko lasamel kel äbinom pötekel enu binom dustodel; jimatel oma löfik, jikopanal leveütik lasama, kelof mütof givön ofen kuladis al stabön kludis; telegafels fl, yunel studel, tevel spänik tedel in Flentän, feilel bäledik i teladel, tedel, lavogel, klerel plofed in Seminöp, plofed Nivera (sanel), e plofed Tidastida.
Bisiedel pevälöl ämanifom kokömi, lilad"l bukili jönik penemöl «Veg labema u Ston filosopik. - Konsäls blefik e balik al vedön liegik. - Fa Benjamin Franklin.»
Bepükam pebeginöl, kopanal sembal, züpel zilik spälüda e plagel milagik ota, ämekom kalami konömik delidopa, in kel äkludon das kanon nulüdön, klotön e domön digiko famüli pakosiadöl de 4 u 5 pösods, me soled de frans telmil, spälöl foldili. Konöm e leod kanoms mekön milagis, ab plogöl vitimamis e nelabis nenumik.
Söls votik äyüfoms e äveitoms zeilis at konömik so sanlik, kels ätidoms bosi utes no pekösömöl al plagön omis.
Ek äjälom cedi milagnik das müton segiv"n valikosi pedagetöl, teor töbo lensumik lä yunel nepematöl äs jälel penota at.
Sanel äplösonom kuladis al blöfön mödi meila e mita keli Medinav (Fisiologia) lücödatom mene as delamöd zesüdik. E müton koefön das nol medinik e nol konömik nebalamoms levemo in dinad at.
Pos lelogams votik tefü vobad e späl, äkludon: «1.o Das in lifadinads lenuik Späna sogaklad dukötik kanom e mütom spälön lemesedas omik mükik, ab letöl noe lölo nezesüdikösi soe bosi zesüdikosa, kelosi kösöm ba pladalom dub meds nepesevöl. - 2o das sogaklad penemöl kanom e mütom mödön lemesedis omik, koseköl timi libik keli cals omik lemänoms, e kel binom sätik ofen, vobades votik dub kels spälüd mutom ya e mögom.»
Äs al distukön, do te timilo, sludis at so loblik, kolkömels anik päsuflagoms al vegam, kel äzitom in del suköl, visitöl ruinis lemäkabik de Sagunto, zif et jamepik kel äkanon jälön oki du muls jöl ta sicam militana de Roma ninöl manis 150.000 büdü Anibal, vunön ati, e lemänön vikodele, äs mesedam lebalik vikoda omik, kumi zenas; e kel pos yeltums 13 äkanom i jälön oki du dels 34, dub te mans 2.300, ta militan selänik de 25.000. Älogon nog daemis bäledik, kelas zon binom setenik, e pakonsefoms i sleps Züteata, des kels jinos das aililon luvoki jekik kritis! kritis soga et pepudöl e dlinamik de blud kritik. Mebs limödik e lio lügik, do glolik, pajafoms fa ruins et!
Zesüdos letön ruinis e nosön mebis, letöl oki dugön fa flen C., lanel tenüdel, kel as kopanal gudik Stomägakluba, äplepalom plo gevegamels, in pof jönik El Grao, paella famik, kela ädesidobsöv givön seplänami liladeles obsik selänik, bi spänels valik sevoms omi umo u luumo. Binom zib klatelik läna, kel labom sägo paelleros jurados (mekelis eyulels ziba at) as ut kel ämekom uit zendela at, kel ävobadom mödikna plo pösods lemäkabik läna e neläna; e zesüdos fidön zibi at us, pekosiadöl ko leüd e nulüdameds läna, pepitöl ko pits et, logöl banoami jönik Zenomela petegöl fa sil nefeiligik fatäna obsik. Valikos suflagom al paella e stigom pötiti, valikos mekos fögetön plisipis e kludis Kongefa konömik....... E zesüdos natemön melavieni e spatön, e plo atos nos pötikos ka deblinön fleni sembal volapükik, (bi volapükels sibinoms i in Valencia e mödiks), in feiladom kela, boso fagik, palilom leki vögas pesepüköl u pepenöl in nets valik pekulivöl tala.......!
Ab ven del nulik delom, e pemosumoms stöms vinila valencianik, e no logon ya leüdi, ni pofi El Grao, ni volapüki sägo, tikäls denusumoms eigaväti stabik, e at bnom ut kel bligom obis, pos mul bal, mebön dölis et e posbükön omis is, bi do aniks ocedoms ba omis yeg pülöfk, labobs speli das votiks okapäloms veüti omik, e das selänels anik sogaklada dukötik osagoms obes, me volapük, liko livon u liko stiton in famüls läna omik sugivi at leveütikün e gletikün konöma domik.
Se Volapük: Gased bevünetik tedelik, nolik, literatik e gälodik 1888, Nüm: 9, Pads: 71-75.