Kis veütos?

No logob oli fovo, sol kel stalol
Do len dels gedik senob neledi ola;
Ats kodoms glifi; desidob gälis ola.
No logob oli fovo, sol kel stalol

Ab labob hiti.

No logob fovo gloli jönik lolas
Ab sül emekom dili alik dinas.
Kis jin veütom? Labob lani otas.
No logob fovo gloli jönik lolas

Ab labob väpi.

No logob logedi ola, löfan oba,
Ven senob omi seistöl su ob, nen logam.
Kis veütos? Lied äbinomöv slanam.
No logob logedi ola, löfan oba,

Ab labob kidi.

Logs oba pekikoms, ab kis daeg veütom?
Ailabob stalis e delaliti so mödik
Das leno kanob vedön evelo glumik.
Logs oba pekikoms, ab kis daeg veütom

Dü labob löfi?

(Pelovepolöl de rigäd fransänik fa red).
[Se Dans ma Nuit. ("In neit oba."). Fa Berthe Galeron de Calonne. Nindugam fa Carmen Sylva. Paris: Alphonse Lemerre, 1890.]

Se Kosmopolan 1892, Nüm: 4, Pad: 56.