Kelos valik kanos pamekön se men

Kelos valik kanos pamekön se men, if dilimom omi kiemiko, musoföp natajenavik in Washington jonom loges visitelas in bügs e gläts. Se fun pösoda vätik pauns 154 pegetoms e pelesävoms: In glätaflad gletik balüdo paus 96 vata, kel möd gletik oselednom ba teldiki; glätabüg votik ninom paunis 3 vienöga kiemiko klinik, pegetöl se kop, du möd gluda paplösenom dub gludaplat vätik pauns 10. Glät votik ninom pini valik peklinöl, vätik pauns 34½, du se boms pauns 8½ zema fosforazüdik e paun 1 zema kolatazüdik pegetoms; de jueg, pöded, »fluorcalcium« e sal ba paun 1, pegetöl se alik fetanotas (kiemik) at, sibinoms. - Kopladot votik, binöl i us, ninom löminis veütikün peninöl in kop menik, dilo in nums, dilo in stöfins jeno sibinöl us. Segun atos men ninom ba paunis 97 züdina, paunis 15 vatina, 3½ nogina e kübafüti 1 kolata. Zu egeton se om grams 120 klolina, grams 90 fluina, 500 fosfora, 90 svefina, grams a 50 kalina e natina, grams a 3 lelina e »calcium«-metala.

Se Volapük: Gased al pakam Volapüka 1894, Nüm: 6, Pad: 5.