Kelin keldi (Qayıpnazarov)
Quwanıshlı tasıp turǵan súyine,
Aq kewilli azamattıń úyine,
Erki menen duz-nesibi shashılıp,
Ómir jolı baǵ gúlindey ashılıp.
Kelin keldi tal jipektey esilip,
Kelin menen baxıt keldi qosılıp,
Kutlı bolsın kelinniń kelgen kúni,
Bosaǵadan boz úyge kirgen kúni.
Kelin keldi kelinler kele bersin,
Kewli jaynap gúl júzi dóne bersin,
Sadıq bolsın watannıń ul-qızları,
Bálent bolsın mártebe juldızları.
Gúl pitsin jaqsı niyet kádemine,
Jurt tań qalsın kórgenli ádebine,
Kórgen jerde qıyılıp kúlip tursın,
Zeyini párdey qıyıp bilip tursın.
Jaqsılıqtı boyına jıynay bilsin,
Jas úlken, jas kishini sıylay bilsin,
Xızmetine hámmeniń kewli tolsın,
Ata-enege mehriban kelin bolsın.