Kanitil (1)
Smadomi bumön vilob;
gadili nog olabob;
feili zu al söpön
in laned vilob labön.
Dom onelabom defi:
fol cemis e bicemi.
In nimöp vo jöl jipis,
svinili bal, fol kunis,
jevali tuvol i bal.
Smamüli len vatafal
e lä pon su lakajol
smanafi jönik logol.
Fels glünik e pepinöl;
valikos peleodöl;
meidis ko söps stedik
miedöl bugi jönik
loegol, smanisulis
us in lak, fago belis.
Zu vipob lelöfliki
vomili smajöniki.
Ab leno löfob vimis
len jipuls, ni ludekis;
de jisom bufum sumob
»bäseti» ka »si», yulob.
Binoföd no tuvemo
pienik, no i suno
zunoföd, ab relöfi
laboföd. Zigolöli
pejuköl luletiko
säbekob beniküno.
Osölom soal nonik:
smasmiläb se gul alik
sun vipom ko päp vegön,
sun vilom goki nögön,
spatini al monitön,
topeti al leblädön.
Tän kisi odatikob?
Bukabögili vilob.
Läd oba eleodöl
vendelafidi, smülöl
lülilof lilädami
ud oba kanitami.
Kotenöf oibinom
lot obas; poisufom
te velat; lupük fago
obinom; yan egelo
manifik plo flen alik
pokikom plo pleitik.
Smadomi ät obumob,
ven moni tö ugetob.
Ab liko käd pomödom?
kelöpo läb posükom?
In loter ba selänik
siedof el benälik.
Se Volapükisten 1889, Nüm: 53, Pad: 2.