Kún qayda? (Kúnxoja)
Ordıq oraq, shaptıq otın, qazdıq jap,
Terdik masaq, iynimizge saldıq qap,
Jas ómirde gúldey solıp, boldıq sap,
Bul júristen endi bizge kún qayda?
Oraq orıp, ómir boyı boldıq qul,
Islesek te, alalmadıq qarapul,
Ne jananlar bayı ólip, qaldı tul,
Endi buǵan jaynap-jasnar kún qayda?
Kúni-túni ordıq pishen, salını,
Gúzdiń kúni jıydıq pisken tarını,
Ómirinshe bir toymaǵan qarını,
Ash-jalańash biz sorlıǵa kún qayda?
Salıq salıp usı hálge hár dayım,
Salıǵın salıwǵa biz boldıq qayım,
Bir jurtım bul waqta boldı uwayım,
Bul júristen endi bizge kún qayda?
Iyinge tartarlıq jáne joq kiyim,
Hám de aǵayin joq, qáwender beyim,
Kósilip jatarǵa jáne joq úyim,
Bul júristen endi bizge kún qayda?
Tapqanımız jetpey qara teńgege,
Awıstırıp kiyim alıp kiyerge,
Hám bazarlıq qatar-qurbı jeńgege,
Alıp barar endi bizge hal qayda?
Ashıǵım bar edi, talmaday boyı,
Qatarınan artıq aqıl hám oyı,
Bolar dep quwanǵan jaqsılıq toyı,
Jiyemurat kóretuǵın kún qayda?
|
This work was published before January 1, 1929, and is in the public domain worldwide because the author died at least 100 years ago. |