Jv/Kakawin Wṛttasañcaya (kritis)

Ing ngisor iki kapacak Kakawin Wṛttasañcaya édisi kritis. Kanggo kaca utama mangga mirsanana Kakawin Wṛttasañcaya

1

• Sang hyang Wāgīśwarīndah lihati satatabhaktingkwi jöng dhātṛdewī
• Pinrih ring citta munggwing sarasija ri dalĕm twas lanen astawangku
• Nityāwehang warānugraha kaluputa ring duhka sangsāra wighna
• Lāwantāstu wruheng śāstra sakala guṇanning janma tapwan hanewĕh //1//

2

• Nāhan donkwājapāngarccana ri sira kĕdö mrākṛtā ng candaśāstra
• Mangke tingkahnya pintonakĕna gumawayang wṛddhyaning wālabuddhi
• Sangkyāning warṇa munggwing sapada tang ingaran canda ling sang kawîndra
• Patsangkyānyang pada byakta dadi sakakawin monumunggwing palāmbang // 2 //

3

Tunggalsangkyaning akṣare sapada huktāranya tapwankalen Yan rwātyukta ngaranya yan tiga tikang warṇângaran madhyama Yapwan pat mangaran pratiṣṭha milu tekang supratiṣṭhanlima Gāyatrī nĕmang akṣaranya huningan syuṣṇik ngaranyāpitu // 3 //

4

Byaktêki wwalung akṣaranya sapadānuṣṭup ngaranyâtĕhĕr / Ndah yapwan sangang akṣaranya wṛhati nāmanya kapwāpagĕh // Manggĕh yan sapuluh si pangkti sawĕlas triṣṭâpan âmeriya Yapwan dwādaśa yeky anāma jagatī ngke rāmasarmenucap // 4 //

5

Yan warṇa tridaśa pwayāti jagatī yan padbĕlas śakwarī Gangsal wlas ya tikātiśakwarī masangjñāṣṭi pwa yan ṣoḍaśa atyaṣṭīki ngaranya yan pitu wĕlas yapwan wwalu wlas dhṛti byaktātidhṛti yan wilang sangawĕlas kṛtyākyaning wingśati // 5 //

6

yan sangkyā nikang akṣaranya salikur yekā ngaran prākṛti / dwāwingśat pwa wilangnikeng sapada warṇanyā ngaranyākṛti // yekī wīkṛti nāma yan tīga līkur yan padlikur sangskṛti / kapwābhīkṛti yan wilang limalikur yan nĕmlikur wyutkṛti // 6 //

7

anghing sangkyaning akṣareng sapada yekā canda kokteng aji / yapwan lintanga ḍaṇḍakā ngaranikī mālāwa lengadyaka // wṛttanyeki muwah yatājarakĕn angkun kokta ring pinggala / tingahning guru len parungguni laghunyekāpadudwan naran // 7 //

8

yadyastun pada sangkyaning yati lamun gurulaghunika bheda ring tata / yāwat mangkana tang prayaga nikanang gurulaghu patatanya kawruhi // tāwatbeda ngaranya ring sapada yeki hinikĕtakĕn an tatan salah / wyaktinyeki nihan rĕngön karacanan hyun inikĕtakĕn ing palambanga // 8 //

9. Nanda

a / na // nda / yang // 9 // (nanda)

10. Bhadrāśrīwanèh

dewī / gorī // bhadrā / saśrī // 10 // (bhadrāśrīwaneh)

11. Nārī

bāṇī śrī / nārī hyang // 11 // (nārī)

12. Wanamṛgī

sahana sang / sura kabeh // cinaru ring / wanamṛgī // 12 // (wanamṛgī)

13. Wijayanti

donku n amūjā / ring surasanggha // mwang stutini ngwang / oṃ wijayanti // 13 // (wijayanti)

14. Tanumadhyā

ngwang mrākṛta wṛtta / panggil tiki rakwa / mangdeya lulutning / kanyā tanumadhyā // 14 // (tanumadhyā)

15. Kusumitajanma

kṣamakĕna ta ngwang / tĕkapira sang wruh // nguni-uni sakweh / kusumita janma // 15 // (kusumitajanma)

16. Madhukaralalita

kĕcapi kawirasa / ndi tan amuhara kung // pahi mara kalawan / madhukaralalita // 16 // (madhukaralalita)

17. Madaléka

āpan mūḍa dahat ngwang / tan wruh ring rasamātra // manggĕh yan cacadĕn ngwang / rehnya lwir madaleka // 17 // (madaleka)

18. Kumāralalitā

ndatan turidaha ngwang / apan tuhu mapunggung // kĕdö manutakĕn kung / kumāralalitāswi // 18 // (kumāralalitā)

19. Waktra

waktraning cariteng lambing / strī wiyoga dinohan sih // sakṣaṇāngdani duhkāgĕng / tan wruh ing daya yan kāngĕn // 19 // (waktra)

20. Patya

yan ing rātrī tatan pāmrĕm / bhramīteng twas wimohita // hatur tan tṛṣṇa ring jīwa / sawetning lāra patyaya // 20 // (patya)

21. Wiparītapatya

sang sĕnĕng sumlap ing hati / lot gumantung hanêng māta // nityasa ngde larādalĕm / patya bālīkakĕn buddhi // 21 // (wiparītapatya)

22. Capala

rāmyaning tāman inusi / panglipurning manah lĕnglĕng // duṣṭaning smāra capala / mālare kāpusan harṣa // 22 // (capala)

23. Wipula

ḍatĕng ing jronikang tāman / kataman hyun dening sĕkar // wipulānĕḍĕng angde kung / kawa dening gĕntĕr muni // 23 // (wipula)

24. Sarwwawipula

srak kabeh wipulāwangi / kumbang anghrĕng amet sĕkar // lwir kakung rabhasāngamer / mrih rarasning awor lulut // 24 // (sarwwawipula)

25. Bhakarawipula

bañu mādrĕs lwir alahar / ri tĕpi jro pang pung aket // pacar adri kweh asĕkar / pakis okĕl mebhakara // 25 // (bhakarawipula)

26. Rakārawipula

mrāknyānawwang dampatīng pang / līlā nṛttātyanta tuṣṭa // rāgī dening lingnikang syung / himpĕr kady ānggīta rakwa // 26 // (rakārawipula)

27. Nakārawipula

codnikāñodyawacana / kuwwangangling tuhu tuhu // tan pahi mwang grahagaṇa / lĕknya dening dinakara // 27 // (nakārawipula)

28. Takārawipula

tapwan lingĕn pasrang nikang / pakṣī manojña ngde lĕngöng // tar pāgawe tuṣṭe hati / ning wwang tininggalning priya // 28 // (takārawipula)

29. Samāni

kĕmbangning surastry aśoka / sĕk samānibeng natarnya // kady apus gĕlungning āśa / lumra ring tilam mrik āŕjja // 29 // (samāni)

30. Rupinī

nahan nikang śilāpĕnĕd / mapaṇḍan ārja tan sipi // nda tāngisapwakĕn puḍak / yatekanā rurū pini // 30 // (rupinī)

31. Māṇawakakrīḍita

honya tikang wwai kumucur / mĕtw i rĕngatning parangan // tusnya kinĕmbĕng madalĕm / māṇawakākrīḍitaka // 31 // (māṇawakakrīḍita)

32. śapantika

mādrĕs hilinya mahĕning / tambing nikārṣikarata // jrah tang sugandha kusuma / śāpantikālingi mulat // 32 // (śapantika)

33. Witāna

pangkaja puṣpa sĕḍĕng mrik / munggw irikang talagâhning // konang unang ri tĕngahnya / pakṣi witāna sukādyus // 33 // (witāna)

34. Widyutmālā

mīṇanyâkweh nānāwarṇā / marbut bhuktinye jroning wwai // kagyat dening pakṣī madyus / kumlab himpĕr widyutmālā // 34 // (widyutmālā)

35. Bhramarawilambita

yasa malangö hinĕduk / racana nikang talaga // kusuma katangga sumār / bhramara wilambita ya // 35 // (bhramarawilambita)

36. Bhujagaśiśusṛtā

ri tĕpi caracaranyāpnĕd / tahĕn asamasa mākĕmbang // kanigara wungu len tañjung / bhujaga śiśusṛtā puṣpa // 36 // (bhujagaśiśusṛtā)

37. Halamukī

nyang mahāntĕn alit atulis / munggu ring parang ana ruhur // ring batur makara kumucur / yan tinon kadi halamukī // 37 // (halamukī)

38. Tātigurwwī

jaladhara riris tan ādrĕs / kiraṇa makucĕm kameghan // wĕkasan apupul matāmbĕh / yatika dadi tātigurwwī // 38 // (tātigurwwī)

39. Cāmpakamālā

prāpta tikang warṣādrĕs ikang wwai / mangkin aweh lĕnglĕng nikang akingking // sang dyah alinggih ring yasa tibra / ngkāna ri sorning cāmpakamālā // 39 // (cāmpakamālā)

40. Twaritagati

ri mari nikang hudan alangö / rawi kumĕñar muwuhi raras // wihaga yatāsuka masiga / hananas ibū twaritagati // 40 // (twaritagati)

41. śuddhawirāt

honyang pakṣy adulur sadampati / līlādyus ri tĕngahnikang raṇu // dwīnya lwir kanakākuning katon / byakta ng śuddha wirātpilih sisik // 41 // (śuddhawirāt)

42. Rukmawatī

kyāti si cakrānggī tikanang strī / swāminikā cakrāngga ngaranya // kapwa ya līlā lālana ring wwai / rukmawatī lwirning raṇu denya // 42 // (rukmawatī)

43. Panawa

sāmpunyādyus akalihan mĕntas / mātūt pinggir anusup ing tuñjung // sāhityânicipi wĕrĕhning wwai / śabdanyâkṛpan awanging megha // 43 // (panawa)

44. Indrabajra

āccharyya sang dyah lumihat gatinya / ātinya kālih kaga cakrawāka // tapwan kagiṇḍal madulur lakistrī / swecânucuk padma kadîndrabajra // 44 // (indrabajra)

45. Upendrabajra

manahnirâninghali mogha harṣa / gatinya nakrīḍa jĕnĕk tan imba // kacitta sang nitya maweh laronĕng / swasasmu sinyuh ring upendrabajra // 45 // (upendrabajra)

46. Upasthita

nda tan wruh ing gatya nirānwiyoga / masyang si cakrânggawadhū sirojar // srah para ngke kita cakrawāka / menggal kitopasthitahe prĕnahku // 46 // (upasthita)

47. Bhramarawilaśita

nā ling sang dyah kadi kadi wulangun / wetning śoka ng hati kasĕkan unĕng // tan wruh ring sambatĕniran angarang / lwir sambatning bhramarawilaśita // 47 // (bhramarawilaśita)

48. Dodakawṛtta

mangkana śabdanireng kaga dibya / ring kapanang wihagāhiḍĕp wwang // mogha dine tĕkaping kawitarkka / śīghra ḍatĕng kadi dodakawṛtta // 48 // (dodakawṛtta)

49. Cālini

rakryandyānung donku sinyangta mangke / āngrĕs twaskun yan lihat kasy asihta // warṇnantālök tan lĕbur wuryyaning luh / sugyan śokāśā liniptêng laronĕng // 49 // (cālini)

50. Wātormmimāla

nā lingnyôjarta sirang glānacitta / ḍu tan mithyā pangucaptêng gatingku // hetungkw āsyang ri sĕḍĕngtāngrarah rūm / ngkānêng toya drutawātormmimāla // 50 // (wātormmimāla)

51. Bhadrika

pira kariki lawas kunang dadi / taya lumihata himparê kita // mapa kari pagawayta ring dangū / matangi kanatituṣṭa bhadrika // 51 // (bhadrika)

52. Ratoddhata

tansipi pwa kalulut mamī kita / rehta tansah adulur sadampati // mukti rāmya sahajāngrarah langö / lot ratoddhata gatinta tan bĕsur // 52 // (ratoddhata)

53. Swāgata

toh warah ngwangi ngaranta harebu / mitrahangku kita yan kita māsih // ḍū tuhan nghulun anāma rathānggi / swāgatāwĕlasi rehta kasihyun // 53 // (swāgata)

54. Wṛtta

patañani pinuni tuhanmangke / mapa kari karaṇaningākingking // rari warahĕniki manĕh rakryan / nda tanakalibaki tatawṛtta // 54 // (wṛtta)

55. śyéni

toh palar nghulun wruhātulung rimang / manglipurkĕn anglare rĕsuntuhan // meta sing sakahyunanta yadyapi / śyeni tulyaha nghulun tĕmĕn mangel // 55 // (śyeni)

56. Wangśastha

kakangku tātan sipi harṣani nghulun / rumĕngwa śabdanta masung suke hati // ri denta tojar manĕkākĕna ng lulut / satoya wangśastha masung srĕpi manah // 56 // (wangśastha)

57. Drutawilambita

rĕngĕn ujarku nihan tĕwĕking rimang / ri patilarsa ngamet rarasi nghulun // taya nimittanikā lalising jinĕm / drutawilambita yan pagawe lara // 57 // drutawilambita

58. Toṭaka

yadiyan kahitung wahuning salulut / luluti ngwang alung masĕwö turida // ri dalĕm śayana ngwang angantyani kung / kungikāwĕtu toṭaka gitarasa // 58 // (toṭaka)

59. Kusumawicitra

ri huwusikāngde kamigupayānglih / lĕlĕh anangis ring śayana mangundĕng // agila tumon ring tapi harĕjāmlĕs / apulang awor mwang kusumawicitra // 59 // (kusumawicitra)

60. Jaloddhatagati

gĕnĕp tĕmu tahun lawasku n akurĕn / silih sih adulur lanāṭikaṭikan // jĕnĕk maguling ing taman mamĕng amĕng / hana n tumuruning jaloddhatagati // 60 // (jaloddhatagati)

61. śrīpuṭa

patani lĕngĕng asimpar śobha rāmya / surabhi kamuning añjrah ring natarnya // bhramara humung aliwran ring ruhurnya / sĕkarika ruru mangde śrī puṭanya // 61 // (śrīpuṭa)

62. Bhujanggaprayāta

yatekonggwani ngwang lanāmutyakĕn kung / lawan sang layat tarwanöhing kalangwan // lĕngĕng lālanāmongkaharṣāngrarah rūm / bhramanteng taman lwir bhujangga prayāta // 62 // (bhujanggaprayāta)

63. Waiśwadèwi

yapwan manglih yan kāla lingsir hyang ārkka / swecāraryyan ring wungkalī tīraning wwai // madyus ring bejyahning bañunyātiśuddha / śobhāng māhantĕn waiśwadewy anggaluntang // 63 // (waiśwadewi)

64. Nawamālini

ri huwusing adyus arjja paḍa mĕntas / madulur umunggah ing śayana māmrĕm // racana nikārjja tan sipi rarasnya / abhinawa mālinī tila-tilamnya // 64 // (nawamālini)

65. Bhramitākṣara

yani tambwanging wulanawā sumĕnö / jĕnĕk ing natarkani sukāmĕng-amĕng // sahajāguling-gulingan ing śayana / bhramitākṣa rāmya mulat ing kalangĕn // 65 // (bhramitākṣara)

66. Jaladharamālā

yan mehning rāhina wa riris tān ādrĕs / rurwang kĕmbang kamuning awor śrīdanta // sang hyang candrāluru makucĕm tan kumram / kewran dening jaladharamālā ngaṇḍĕh // 66 // (jaladharamālā)

67. Prahārṣinī

yapwan kāla ri tĕkaning basantamāsa / swecācangkrama mahas ing pradeśa rāmya // tan sah ngwang kalih adulur lawan kakangku / sāsing rāmya mamuhara prahārṣinī twas // 67 // (prahārṣinī)

68. Rucira

pasir wukir paraparani ngwang anglĕngöng / macangkramā kalihan apet rarashati // sukāngrĕrĕb-rĕrĕb irikang tapowana / lĕyĕp langönika rucirāngungang lurah // 68 // (rucira)

69. Punarmada

kadi wah kalangwan ulahing wanāśrama / kayu māsnikārwan akuning sawang tatur // amirah tuding pisang alasnya ring jurang / amangun punarmadaning angrĕgĕp langö // 69 // (punarmada)

70. Mattamayūra

eñjing mintarmātuti himbangnikang adri / lĕnglĕng dening pakṣy amijah gārjjita ring pang // asrang tang syung kapwa maśabdāngakamanggĕh / kagyat dening śabdanikang mattamayūra // 70 // (mattamayūra)

71. Ambudhiwīci

trang pwa ng we kumram i hiringing gagaṇābhrā / sakwehning tāni paḍa katon kalangönya // lĕnglĕng lwirning sawahika wāhu matandur / rī drĕsning māruta kaditāmbudhiwīci // 71 // (ambudhiwīci)

72. Kuwalayakusuma

sakwehning rānya sama kajajahan deni ngwang / tāman len maṇḍala kuṭi paraningwang līlā // tīrthākweh lyan raṇu kahaliwatan mangde kung / madhyanyāñjrah kuwalayakusumanya mrikmar //72 // (kuwalayakusuma)

73. Asambādha

nāhan lwirku n ngūny adulu-dulura kārwan kung / mangke pwa ndīkin katĕkana waluyāngrat hyun // nghing tunggal sihtā pinalar ing anahĕn kingking / prāptāsambādhātryanĕkakĕna wuwusni ngwang // 73 // (asambādha)

74. Apurājita

tuwi taya śaraṇangku lena sake kita / manĕkakĕna lulutkwi sang magawe lara // rarahĕni langĕning wukir patapan lĕyĕp / yadi katĕkaha ring jaladhyaparājita // 74 // (apurājita)

75. Praharaṇakalika

kaka-kami palarĕn wruha malĕs alulut / yadi hana wara-sihta matulunga rimang // tumĕkakĕna pasambating alawas akung / kita juga turida praharaṇa kalika // 75 // (praharaṇakalika)

76. Wasantatilaka

sangsiptaning wacanani nghulunī kita pwa / tāngkatpare sangawasang madanāngrasi twas // prih pet rarah tañakĕne gĕrĕh aywa manghel / sang lwir wasantatilakāsik aring hatingku // 76 // (wasantatilaka)

77. Maṇiguṇanikara

nahan ujari sang angarang alangĕ siwuhĕn / mangĕnani hatining aganilaya mawĕlas // dadi ya sumahur agĕlĕm anĕkana ng ulah / suka maṇi guṇanikaranika yan inalĕm // 77 // (maṇiguṇanikara)

78. Mālini

ibu ring apa matangwang yan tan angge pakonta / yadi sapawĕkasa dyah mrĕk mareng pringga durgga // mapa ta wuwusani ngwang yan kapanggih kakungta / mamuharaha sihing janmā linipteng laronĕng // 78 // (mālini)

79. Wṛṣabhagatiwilaśita

nāhan ujarnikang kaga ri sang araras alangö / ndan sumahur sang adyah amarahi wuwusanika // yeki linganta toh rĕngĕn ujari pinuni kita / prāptakĕneng sangaśwa wṛṣabhagatiwilaśita // 79 // (wṛṣabhagatiwilaśita)

80. Jagatpramudita

rakryan aturniking kaga ḍatĕng sumĕmbahi kita / ndan wara ceṭikānggĕhi pinunmare kita tuhan // donkw inutus uyarinta manĕkakĕnāng wuwus arūm / rī kita sang tulus gumawayang jagat pramudita // 80 // (jagatpramudita)

81. Mandākrānta

māsni ngwang toh diwaśa tĕkaping mangwalanglang kalangwan / tolih rantĕn rasika kari tibrāngarang kaṇḍĕhan kung // śokāgring ring taman agulingan ring hĕbing nāgapuṣpa / mandākrāntang bhramara manangis ring ruhur darpa manghrĕng // 81 // (mandākrānta)

82. Wangśapatrapatita

tan kĕna ring panganturu sawetning unĕnga ri kita / lot manangis manguṇḍĕng amangun wĕlas ikang umulat // tan huningeng sĕkar hyas atirūkṣa mawĕnĕs asamun / lwirnika wangśapatra patiteng śayana yun aguling // 82 // (wangśapatrapatita)

83. śikariṇi

ri tistisning ngwe sūryyakiraṇa mayat tunggang acala / makin tibrānto tingkahi racananing pāmrĕman arūm // kacitte twasnya nduk sĕḍĕnging akaron rāgaturida / lawan rakryan sang darppa mungari langöning śikariṇi // 83 // (śikariṇi)

84. Pṛthwītala

lĕngöng ri wijiling wulan kumĕñar ing langit bhāswara / mĕkar kusumaning tahĕn rinubung ing dwirep hānangis // samangkana rarinta yan tumurun ing natar kanglihan / mangö ri pajanging śaśāngka maguling ri pṛthwītala // 84 // (pṛthwītala)

85. Hariṇidhwani

sipi kasih arĕpnyārintāngde wĕlasi nghulun / pira kari lawastātinggal tan sah ing ḍalĕming taman // mangarang anangis nghing rakryan tang sinambatikin rimang / kawuwuhan unĕng dening pāmangsuling hariṇidhwani // 85 // (hariṇidhwani)

86. Rajani

yani sirĕming wulan hana ririsnya sumĕmbur atis / manĕlĕs ulĕsnya pingaya mangun wĕlasing lumihat // taḍah asihing tawang bhramita moni mangālik alik / sapanangising kalangwan i sĕḍĕngnikanang rajani // 86 // (rajani)

87. Citralékha

nghing tekā nityang kinatikin amĕr tan madoh ring kisapwan / sambatnyā keṣṭīng karasa rĕja kapwā papan danta marṇnik // baryyanta pwa n sah pinakapanamunya prihing hatya kingking / lāwantekā lot hiniling-ilingan citralekhanta lambang // 87 // (citralekha)

88. śārdūlawikrīḍita

nā sangsiptaniking wuwus lingakĕnante sang kakung ni nghulun / yan tan wantĕn sanmatanya ring akung byaktang paratra nghulun // lāwanteki sakawruhanta mangucap prih sangkananyāsiha / tāngkat tebu tatankahaṇḍĕga kiteng śārdūlawikrīḍita // 88 // (śārdūlawikrīḍita)

89. Méghawisphūrjjita

ndan anghing lingni ngwang ri kita tulusāsihta ring strī wiyoga / hayo tan pinrih ring hati sapawĕkasni nghulun ring kakangku // lawan haywā tan yatna ri sarusiting mārgga sĕngkan jurang lwah / nihan mārggantānūta ri kalangĕning meghawisphūrjjitāśrī // 89 // (meghawisphūrjjita)

90. Suwadana

nāhantojarni sang dyah winĕkasakĕnireng cakrānggawanitā / sāmpun kesī hatinyang wuwus ujarakĕna nyāmwit ya wĕkasan // kālih kāsihnya śīghrānglayang i tĕngahikang byomārddha maruhur / lālityāsong limut līla lumihati langö kālih suwadana // 90 // (suwadana)

91. Gli

nyang langö tinon ikang wihanggaceṭikā tinung kutungkulanya / lwah magöng sakeng wukir tumĕmpuhi jurang hilinya mādrĕs atri // simpanging bañunya winwatan ri sornya sök pakis dawut ya keli / denikang wwah ādrĕs anggaluntang aglis osyaning kĕḍung ndyaṣanya // 91 // (gli)

92. śragdharā

honyang deśālangö himbang ing acala katon katrangan sūryyaraśmi / angde kung pomahanyārĕja paḍa kalakah tūt hiring tanduranya // nyu dantāwwah paḍātĕb saha pucang ajajar lyan pisang tūt gagārṇnĕb / sakwehning kaywa-kaywanpaḍa manĕḍĕng sragdharāngimbuhi śrī // 92 // (śragdharā)

93. Madraka

lwir mawayang tahĕn gatinikang wukir kinĕliran himārang anipis / bungbungikang pĕtung kapawanan yateka tuḍunganya munyang arangin // pakṣi kĕtur saluṇḍinganikā kinangsyani pamangsuling kidang alon / madraka śabdaning mrak alangö sawang pangidunganya mangrasi hati // 93 // (madraka)

94. Aśwalalita

ri sukunikang wukir tani kasimpar angharĕpaken lwah arja madalĕm / taru tarukan hañar ngganika tanduranya turi len jayanti majajar // wwang ika samānjĕnĕng-jĕnĕngi têng dudūng maṇapuna pwamongi balĕman / raraya rubung-rubung ri hĕbikang tahĕn prasama mangwan aśwalalita // 94 // (aśwalalita)

95. Mattakrīḍa

tan tunggal rāmyāning mārggāmuhara lĕngĕngi manahikang angangĕn-angĕn / tāman len katyāgan śobhā racananika mangĕnani hatining umulat // tañjung bāṇāśoka mwang cāmpaka surabhi kanigara masĕkar anĕḍĕng / mattakrīḍang kumbang darppāngrubung anici-nicipi sarinika tanari // 95 // (mattakrīḍa)

96. Tanwi

tan wuwusĕn lwirni sakalĕngĕnganing mārgga katungkulan amuhara lĕnglĕng / lāmpahikang wyomakagati caritan medran apet kananira sang aweh kung // āpan ikang wiṣkira satata mawas rūpani sang layat atilar ing adyah / lwir kadi tan wiṣṭinika manĕkanang kahyuni sang akung alara katinggal // 96 // (tanwi)

97. Wikasitakusuma

sāgara lĕnglĕng rāmya katon denikanang aganilaya saka ring awang-awang / ring tĕpi mangjrah paṇḍan atuntun sari-sari paranika sang akung asĕnĕtan // lyan tumuwuh ring nūsa katampwan ryak angĕnani parang anarĕsa ringi-ringih / madhyanikang nūsārĕja tekang kayu-kayu sama-sama wikasitakusuma // 97 // (wikasitakusuma)

98. bhujanggawijṛmbhita

ngkāneng tĕmbingning singgrong jrah piḍaḍa majajar atata lĕyĕp langönya tininghalan / pangdukning her tambang sangke rĕngat ikang upala tumĕḍun atri gañca tibeng parung // himpĕr wṛṣṭyādrĕs sĕmburnya n tiba kasĕlĕhaning aruṇa lumra wangkawa yan tinon / dudw ang wwai muñcar lyan tekang mĕtu sakari parangan anamar bhujanggawijṛmbhita // 98 // (bhujanggawijṛmbhita)

99. Apawāha

honyang dwirada parangani tĕpinikang udadhi tulis araras angde kung / śobhā mijilakĕn udaka sumira-sirat anali-nalin atitir anĕmpuh grong // ngkā tang wihaga tumurun alangĕ lumihat i lĕyĕpikang udadhi yatālīlā / gĕntĕr muni maḍĕḍĕma sahuranam aji talinga masawangan apawāharṣā // 99 // (apawāha)

100. ḍaṇḍaka

atuti tĕpinikang pasir medra kāḍaṇḍa kārwādulur harṣa yar ton lĕyĕpning tasik / lĕngĕng angulati sang pinetnyāmalaryan katĕmw āngrarah rūmnikang sāgarāngdon langö // rinarah ika ri rāmyaning nūsa kañcit kapanggih sang andon langö līla tanseng karas / tĕka sumuyug ikang wihanggāpajar yan priyāceṭikānggehnya de sang dinohan lulut // 100 // (ḍaṇḍaka)

101. Udgatawisama

sawuwusni sang kadi ratih winuwusakĕn ikang wihanggama / wruh niki n angucap apet turida / amangun prapañca tang ujar mukodgata // 101 // (udgatawisama)

102. Sorabawisama

sira sang kakung kasaputan turida rumĕngĕ lingnya kāsyasih / lingnirāmuwus alon sumahur / atisorabāwacana mangjĕngĕr hati // 102 // (sorabawisama)

103. Lalitawisama

ndatan alali si langĕning śayana / saka ring harĕpku lalita nggurit langö // 103 // (lalitawisama)

104

ri tĕkanta ring kahanani ngwang inutusira sang karîng puri / mogha kadi tinitahing madana / wisamātri tan sipi kaharṣaning hiḍĕp // 104 //

105

tapwan inggurit i pinun kakawin / sinamāntareng kalangĕning payonidhi // 105 //

106

satĕwĕk kunang lĕngĕng angiṇḍangi kalĕngĕnganing pasir wukir / lot sumusuki hati sang katilar / satatā mirangrwangi ri cittani nghulun // 106 //

107

ngwang mangkyāwusanāngucap sagatining wṛttenucapning mangö / mangke ngwang maluyeng purāngulihanang lampah bangun ri dangū // kweh wṛtteng malangö tatan liningakĕn mangke tĕkapni nghulun // 107 //

108

nāhan lingnira sang kakung tĕlas adan mantuk lumampah sira / ndātan sah madulur tikang wihaga tut mārggālangö lālana // tan waktan gatining hawan krama huwus prāptî dalĕmning puri / rāmyāwor turideng paturwana ngajöng sihning makārwan lulut // 108 //

109

anghing hinghaniking palāmbang agurit mpu Tanakung atimūḍa duryaśa / candaprākṛta wṛttaning guru lawan laghu racanika ndatan kalen // akweh wṛtta turung lining mami palenakĕna muwahi kopalakṣaṇan / yan ring pinggalaśāstra kewala kadîkang inajarakĕn ing palambanga // 109 //

110

tuhun sahana sang kawîndra mangupakṣamā ri nghulun / gatingku n angikĕt palambanga kurang raras tan padon // tĕhĕr matiki wṛttasañcaya ngaranya dening mangö / palar magawayang wiśuddha ri manahning anggöng langö // 110 //

111

sāmpun prākṛtaning mangö yatika warṇna tanuhuti manahnya duryyaśa / wetning bhranta wisāṭa kārwa lĕpihan panamukika riringranging hati // āpan tan hana tang wĕnang mawĕlase sagati nikin atīta kāsy asih / nora ng hetu maśabda kewala samângguyu-guyu ri kapinggingi nghulun // 111// //

112

ndan hantusākĕna damĕl Tanakung palambang / arddhākikuk tan alangö tan amĕtwakĕn kung // sotanya n antuk ikang aspada ring kalangwan / kawyênjuh anwam inucap magawe panas twas // 112 //

Épilog

iti wṛttasañcaya // cakrawākadūta carita // Tanakung //