Jv/Kakawin Nītiśāstra/Pupuh 8

Pupuh VIII – Ragakusuma

1.

• tikṣṇa hyang rawi ring prabhāta magawe kṣayani tanu halanya manglare
• yan sore sira manda-teja hatur āmrĕta paniraming angga durbala
• dhumojjwālaning anggĕsĕng śawa mareng awak anurudakĕn kayowanan
• prāyaścitta mayajña homa wangunĕn pangilanganira pāpa kaśmala

2.

• sakṣāt dagdha gĕsĕng tikang wadana yan kita tan anginangerikāng sabhā
• sakṣāt dagdha gĕsĕng tikang muka yadin prihawak anginangerikāng sabhā
• sakṣāt dagdha gĕsĕng tikang wwang anwam i wayahnya dumadak ika hīna kāsyasih
• sakṣāt dagdha gĕsĕng tikang huwus jaḍa pikun dumadak anĕmu bhāgya wīryawan

3.

• ring rāt pitrĕ ngaranya pañca-widha sang matulung urip i kālaning bhaya
• mwang sang nitya maweh bhinojana taman walĕs i sahananing huripnira
• lawan sang pangupādhyayān bapa ngaranya sira sang anangaskare kita
• tan waktan sang amĕtwakĕn ri kita pañca-widha bapa ngaranya kawruhi

4.

• artha strī magawe wirodhanira sang sujana tuwi manahnirāgĕlĕh
• tan manggātika kociwāmbĕkira ring rwa karaṇaning akol paḍābutĕng
• sihning mitra kadang suputra bapa len guru hilang atĕmah manah gĕlĕh
• anghing sang wiku nisparigraha, wadhūjana dhana kadi loṣṭa tanpa don

5.

• wwang mūrkātika duṣṭa hinganing umahnya mangalĕm ing awaknya ngastuti
• yan sang pārthiwa hinganing swa-pura ngarcana wara guṇa wirya wikrama
• yapwan sang prabhu ring swa-pora paḍa ngastawa sa-lĕbani bhūmimaṇḍala
• sang yogiśwara sarwa bhūmi paḍa ngaracana ri sira manamya sādara

6.

• tan mitran tikanang durātmaka, sirang sujana juga minitra sewakan
• tan lupteng yaśa dharma puṇya gawayĕn rahina wĕngi taman hĕlĕm-hĕlĕm
• ewĕhning pati tan kĕnenaku, ng uripta suka wibhawa nora saśwata
• yatnā sewaka ring mahāmuni sipat siku-siku patitis tañākĕna