Jv/Kakawin Nītiśāstra/Pupuh 14

Pupuh XIV – kusumawicitra

1.

• ika hulahĕn ring śiśu ya ta sikṣān
• pagĕha ri kābhyāsaning aji tan len
• apan ikanang yowana wiṣayābwat
• ya tika sĕḍĕngning tuha muni wrĕtti

2.

• kunang i ḍatĕngnya ng mṛta tĕpĕt ambĕk
• atutura ring yoga tayaning ātma
• taki-taki tosön pakĕkĕsa sang wruh
• wĕkasanikāng tan hana juga tosön

3.

• satata musuhning mangarĕki widya
• ṣaḍ ika wilangnyengĕtakĕna denta
• ulahing alĕswa malanika māgöng
• apituwi sang wyāsana ya ri duṣṭa

4.

• nguni-nguni yan wwang gĕring atirukṣa
• ‘pituwi sĕḍĕng rāga taruṇa manwam
• kimuta yadin wwang satata daridra
• lawan ing ulah dyah ta saha nitādi

5.

• kunang ika yan wwang mana ya kĕnewĕh
• manahika pakṣa druhaka sadarpa
• taman agawe śobhita ring awaknya
• kasih-arĕpi lwir kusumawicitra

6.

• pangawasaning ṣaḍripu ya ta mangde
• pamurung i śāstrāgama yan apingging
• ingĕt-ingĕtĕn rehnya ya ta gĕgönta
• apuwara śīrṇā hilanganikang twas

7.

• catur angilang śakti ta yan awak tan
• raray, i sĕḍĕngning mangaji tan erang
• nara kasih-arṣa mri rĕbut i bhukti
• lawan ing ulah dyah ta saha nitādi

8.

• nara mapacārārĕbut apapakṣan
• alah-amĕnang tan rinasan irangnya
• sadulu-dulurnyātiśaya paḍākral
• huwus ika rehnyeti kajar ing śāstra

]]