Jv/Kakawin Kuñjarakarṇa/Pupuh 1

Pupuh 01 - Jagaddhita

1.

• Sang dhirâmrih ayuddha ring raṇa tapa brata makalaga wira sadripu,
• Lagyabyuha samadi tatwa guṇa wahananira karunadi dharana,
• Samudra dwaja singhanada japa mantrawara danu acintya bhawana,
• Bodhijñana sarotamangilangaken ripu makapala dharma sunyata.

2.

• Saksat murti bhatara sakyamuni marawijaya sira sang samangkana,
• Manggeh manggala ning mango pranata baktya sikara ri lebuni jöngnira,
• Stutyangken pratima pratista ginelar makuṭa widi winijan akṣara,
• Inyang ni ngwang amogha tan saha sake padanira mara janmaning hulun.

3.

• Lawan dening angarcane pada bhaṭāra sugata pinakeṣṭi dewata,
• Nirwighna ngwang amarṇa-marṇa mikĕta ng caritanira n adharma deśana,
• Angken camaniyanira kasakena kastawanira pinawitra ring jagat,
• Panggil rakwe wĕnang pangahwata ri janma ning ajar ajar angregep langö.

4.

• Ndan sambodananing hulun ri sira sang kawi nipuna pinandeleng langö,
• Ndatan kojara salpakangidan idan ngwang angiketa kata palambanga,
• Tan sangke wihikan tuhu n mangiringêng gati para kawi matra ring langö,
• Tan samwas pwaku rasa ng awruh apa tan kawiku mapi durung wruh ing krama.

5.

• Sotan ta ngwang apunggung ngatpada mango patitut i dang akirti bhaṣita,
• Tonen lwirnya irim irim ya masaroruha ring apa ya sadya tunjunga,
• Mangka teki aturnya tan sasiringeng para kawi samaniwya ning langö,
• Nghing têki inantusa riwa-riwa ngikĕta carita de kawiśwara.

6.

• Wwanten Kuñjarakarṇa têki pangaranya carita ya ta dadya padika,
• Ndan wyartenapus ing kadi ngwan adusun wipala kadi mahapupu areng,
• Simbanten maka awayning carita mangkin amuwuhi panindaning para,
• Wyaktinyamuhare kilasyakarananging apura niki de mahajana.

7.

• śrī Wairocana purwaning carita kalanira pinarĕk ing watĕk sura
• Ngkanêng bodhi wihara nirmala samangkana ta sira n adharma deśana
• Aksobyadi sang bodhisatwa pariwara marĕk i sira baktya murṣita
• Mwang sakweh para bajrapani suranata yama baruna len danadipa.