Jv/Kakawin Banawa Sĕkar Tanakung/Pupuh 2

Pupuh 2

1.

• Śrī nātha prabhu sang makāntya mahatur banawa mawangunan sĕkar minging
• Lañcang-lañcang ikârja pādapa tinap sinalisir alunas-lunas puḍak
• Kuñcupning tarawarṣa tīhanga mabāhu sarasija mabang katinghalan
• Arĕcĕp warṇa nikâlayârja ring apiṇḍa jari-jaringan ing walantingan

2.

• Janggâmrik makatambirangnya yaśa pāngin-anginan ika sĕh sĕkar marum
• Raśminya n pahatĕpning jring awuwung jalada tuhu lĕyĕp tininghalan
• Roṇḍoning kayu kañcanârja kamuḍinya makuning anamar-namar tatur
• Arjâslat prabhu sanmatâsana lawan wungu pinakakatinnikâraras

3.

• Sinwam ing taru raśmi pātakanikângaway-away i sirirnikāng angin
• Tingkahnya n pawide rwaning katirah apnĕd inangit araras winarṇana
• Sanggâkāśa lawan wlasapti tali dandan alabuh upalâsĕpĕt gaḍing
• Tan pêndah kadi jong sĕkar manĕngah ing jaladhi mara panarkaning mulat

4.

• Tunggal sang kawi manglĕngĕng puwawah ing banawa mangé malinggih ing wukir
• Secchâmangku karasnirêndah apapan kanaka saha tanahnirêng kapö
• Lwir mahyun mikata ng sakêndriya tĕhĕr nĕmahakĕna palambanging karas
• Yan sampun srahĕneng narendra samudāya malar asunga sanmatêng mangö