Jv/Kakawin Arjunawiwāha/Pupuh 5
Pupuh 5 - Sikhariṇī 
1.
a. uwus manggĕh tâmbĕk Surapati lawan dewata kabeh
b. ḍĕngĕr wṛtta śrī Paṇḍutanaya mamanggih kasutapan
c. yayā taṇḍasning Daityapati juga kawwat hiḍĕpira
d. tuhun tunggal sandeha talutuhira ng harṣa kawĕkas
2.
a. kaweragyan sang Pārtha kawaśanikang dhyānawimala
b. dadi n singhit ring mokṣaphala malupêng wāhyawibhawa
c. luput pwêkāng sādhyā ya ta karaṇaning mahyun umarā
d. lumāmpah lwir wṛddharṣi lilu tumĕkul sāmpun awuda
3.
a. wawang prāptāpan hyang kadi makahawan hyunnira tĕka
b. kapanggih têkāng āśrama winuni dening jaladhara
c. hudan pwêkāng kālānggĕgĕs atha sirānginkin atĕkĕn
d. mangantī tunghāning wiwara mapi tan wruh makidukus
4.
a. asowe tan sinwāgatan api watuk lāgi, madahim
b. aparwāmbĕk sang pārtha linĕsunirang yoga sakarĕng
c. katon sang pandyāweh ta sira sakapujāning atithi
d. matakwan ring sangkan paran sumahur sang muniwara
5.
a. nghulun mābhyāsātīrthagamana mahas ring giriwana
b. anon teja nda ngke paraparahikāng laksap katon
c. pilih tīrtha pwekāng madhanuha ya tān pandits tapa
d. kṣamā tāntĕn tanpānglalarana samādhī kadi kita
6.
a. iku ng yogābhyāsātiśaya bapa kāndeg ngwang umulat
b. kaworan hingsākarmma kawaca laras kadga humadang
c. panonan ryy ambĕkning mangusira sukākaryya wibhawa
d. namuu heman yan tan makaputusa sang hyang kalĕpasĕn
7.
a. ikāng ambĕk yan sāmpun amatĕh anuut ring bratatapa
b. kĕnoh pèngpÖngèn singhitakĕna mareng uttamapada
c. mangiṣi pwekāng wāhya-phala lumĕkas teka kasasar
d. ndya doning janmātinggal amṛta mahāngungsira wisa
8.
a. apan yan wāswāsĕnn idan-idan iking rāt putusana
b. amet bhoga swarggādi katĕmu yayātah kasakitan
c. angel dening pācendriya sadigawe mogha wulangun
d. mungĕng tan wruh ryy āwaknya wuta tĕkaping rāgawiṣaya
9.
a. hanānonton ringgit manangis āsĕkĕl muḍha hiḍĕpan
b. huwus wruh towin yan walulang inukir molah angucap
c. haturningwang trĕsnêng wiśaya malahā tar wwihikana
d. ri tatwanyān māyā sahana-hananing bhāwa siluman
10.
a. ujar sang papoyārūm kamuniwacanan bwat kawiratin
b. sinambut de sang pārtha rahayu dahat ling muniwara
c. kunang yan dharmma kṣatriya yaśa lawan wīryya linĕwih
d. yayadwat ring gĕgwan makaputusa sang hyang kalĕpasin
11.
a. apan nora wwang tyāga ri dalĕm i heng yāwat ahurip
b. ikāng nirbbānācintya pats patitisning wang irikā
c. pangantyantyan tekāng sutra-wibhawa līlāmĕng-amĕngan
d. ujar sang pārthāngakṣama sinahuran de muniwara
]]