Jv/Kakawin Arjunawiwāha/Pupuh 28
Pupuh 28 - Rucirā 
1.
- a. huwus pĕjah sang asuranātha ring raṇa
- b. linūd ing agniśara sabhṛtya wāhana
- c. kadi pwa Kālayawana dhūli sakṣaṇa
- d. śināpa de nira Mucukuṇḍatāpasa
2.
- a. rĕrĕb kuwung-kuwung awilĕt ring ambara
- b. anīlanīlajalada manghĕmū hudan
- c. rawiprabhā kalanganirânisih katon
- c. wiśeṣacihna sang adhikāra yan pĕjah
3.
- a. ikang surâpsara mati len hanâsakit
- b. sinanggrahêng amṛta tĕkap surâdhipa
- c. yathārtha nā sang amṛta tan tulus pĕjah
- d. muwah sulakṣaṇa saha bhṛtya wāhana
4.
- a. mulih ta sang surapati tan wĕnang kinas
- b. ikang sukhâsama-sama söngnya ring mukha
- c. mulih mangarwani ratha sang Dhanañjaya
- d. jĕnĕk mucap krama ni tĕkapnirâlaga
5.
- a. marĕk tikang surabalasanggha ring ratha
- b. mawĕtwa-wĕtwan ulah ujar kasewakan
- c. paḍômucap kramani lĕkasnikang laga
- d. balik tikā sang aguṇakāya tan jĕwah
6.
- a. byatīta sang muliha sĕḍĕng hanêng hawan
- b. aneka tang jayaphala rājabhūṣaṇa
- c. wiśeṣawāhana hana ratnakanyakā
- d. sapanghaḍâpan ulih ing angdhwajāhṛta
7.
- a. kunĕng pwa sang mabuhaya yêki warṇanĕn
- b. ikang sĕnĕng kadi hiliran paḍânghaḍā
- c. anekawṛtta paḍa rinĕngwa-rĕngwakĕn
- d. swabhāwa nāgata pinarabyakĕn hañang
8.
- a. hanângarang matĕlasanângalang hulĕs
- b. mangö hanan lĕsu pangisinya tan padon
- c. wuwusnya sanggraha katĕkan panasbharan
- d. lĕhĕng ta kanya pabuhayangku ring natar
9.
- a. hanêki parcaya riy asihnikang sĕnĕng
- b. tumohi göngni kahulananya ring priya
- c. wungan-bawahni wuwusikā mĕngĕn-mĕngĕn
- d. wĕnang karī bañu hañang anglĕbur tasik
10.
- a. hanêki göng lara lĕwih ing putĕk hati
- b. pilih titir pinaśapathâkĕn ing tilam
- c. rare turung wruh i purih ing karāsikan
- d. wĕnang lĕñok ng wwang i sĕḍĕng ing pasanggaman
11.
- a. hanâkire wulat amanis panungsunga
- b. ikang wuyung saputana raśmi ning guyu
- c. harĕp tuminghalana jalunya pet siwi
- d. malah priyambada ika lingnya mangkana
12.
- a. dudū tikang mahayu wĕḍaknya gopita
- b. mungup katon ri hati luput sakêng tapih
- c. lĕkas mahâpi lara sinanggrahêng ulĕs
- d. pinet ikāng ubhayahitân kapanggiha
13.
- a. tangeh kawarṇan i laraning surângganā
- b. wiyoga ning wahu pinarabyakĕn hañang
- c. ḍatĕng ta sang surapati kapwa ghūrṇita
- d. tĕkapnikang tabĕ-tabĕhan tĕkêng langit