Jaz kúni (Qayıpnazarov)
Jarqıraǵan jaz kúni,
Jumıs kóp, waqıt az kúni,
Sovxozǵa keldim saǵınıp,
Miynettiń qızǵan saz kúni.
Gúllengen xosh iyisi,
Jetilip pisken jemisi,
Kútip aldı ózimdi,
Adamnıń soqqan beyishi.
Kótergen kókke kewlimdi,
Tuwılıp ósken elimdi,
Mıń beyishke bermeymen,
Usı bir turǵan jerimdi.
Jerime gúller kógertken,
Elimniń sánin kórkeytken,
Súyemen miynet adamın,
Shellerde baǵlar dóretken.
Ózgergen, ósken awılım,
Awılım kúshim, qarıwım,
Traktor aydap júripti,
Miynetti suygen bawırım.
Jumısın kórdim quwandım,
Íqlasın kórdim inandım,
Úlgili etkei isinen,
Jırıma qanat kúsh aldım.
Usı kúsh oydı erletip,
Qıyaldı qozǵap terbetip,
Xalqımdı súygen júrekten,
Jırlarım shıqtı erjetip.