Jaylawım

by Kúnxoja

Ata jurtım Túrkstannan kelgeli,
Ata-babam qonıs basqan jaylawım.
Anadan tuwǵalı, esim bilgeli,
Oynap qatar ósken qalıń jaylawım.

Kún boyına bayır etip turaqlı,
Men ketermen árman menen jıraqlı,
Qamıs orıp altaw-jetew oraqlı,
Teris tebe, Uzın qayır, jaylawım.

Ólim xabarınan kelmegey saza,
Endi aytayın sózdi amanlıq taza,
Erjan ataw menen shıǵısı Írza,
Teńizlerden awqat etken, jaylawım.

Balıq awlap Toqtas, Mantıq boyınan,
Balıq shanshıp jazda júrip oyınnan,
Shanshıp, saylap júrip jayın moynınan,
Ata-babam, awqat etken, jaylauım.

Ábdimurat molla, Ibrayım menen,
Jáne qaytalımda Izmurat gereń, Qıtay,
Qońırat hám de qalıń el menen,
Ata-babam, awqat etken, jaylawım.

Alasat tabılsa barlıq el kósher,
Kóbeyip tur aramızdan qan isher,
Jetim jılap, ılaq mańırap kún kesher,
Árman bilen júrermen be, jaylawım?

Jaylauım Jalayır, Kópir hám Bóget,
Suw keler me degen bizde bar úmit,
Shaqaq urar aqır bir kún qız-jigit,
Árman bilen qayǵıda ósken, jaylawım.

Áyel-ha óskenim Kók ózek boyı,
Adamnıń jeter me shuǵılǵa oyı,
Puqaranıń taymaǵaylar tap-kúyi,
Árman bilen ósken arzıw, jaylawım.

Qızlar menen suhbet etip bilgenshe,
Doslıq, mehribanlıq etip ólgenshe,
Sen arman tur, sen berman tur degenshe,
Árman bilep ósken arzıw, jaylawım.

Bekban shaǵıl, Jańa suwdıń boyları,
Sharqırawıq, «Múyten bóget» jayları,
Jayılǵan baylardıń sansız qoyları,
Kózime totıya júrgen, jaylawım.

Kól saǵa, Ayırsha, Terbenbes teńiz,
Ásirese Ayırshada óskenbiz,
Birikkende kókeylerin keskenbiz,
Árman bilen ayra túsken, jaylawım.

Jaylawım jay edi málim hámmege,
Quda baxıt bermedi me bizlerge,
Hásiretiniń daǵı endi júzlerge,
Árman bilen qalarmısań, jaylawım?...