jan Sitata li sama waso alasa li pona lukin li jan lili pi jan sona sewi · ona en jan sama Kowinta pi jan sona sewi ante li kama suli lon pimeja tomo, lon suno pi telo linja, lon poka pi tomo tawa telo, lon pimeja pi ma kasi Sawa, lon pimeja pi kasi kili · jan Sitata li lon telo la ona li pana sewi li telo e sijelo kepeken nasin sewi · suno li pimeja lili e selo walo ona · jan Sitata li lon ma kasi kili la kasi li pimeja e lukin ona · ona li musi li kute e kalama pi mama meli ona · ona li nasin sewi li kute e toki pi mama sona ona · tenpo mute la jan Sitata en jan Kowinta li kama sona e nasin toki pi jan sona e nasin lawa · jan Sitata li sona kalama sewi On · ona li ken kalama On kepeken kalama ala lon lawa · ona li kalama sewi kepeken kon insa li ken kalama sewi kepeken kon weka · kalama sewi On la lawa li awen lon kon sewi · kon sona li suno e sinpin lawa · jan Sitata li sona pilin insa e kon pi wan Aman e ale ona e pini ala ·
mama sona pi jan Sitata li pilin pona mute a tan sona pi jan lili ona · ona li pilin e kama ona li toki insa a : ｢jan lili mi li kama jan sona sewi suli!｣
mama meli li lukin e jan Sitata la ona li pilin olin a · jan lili ona li pona lukin li wawa li toki suwi tawa ona ·
meli lili pi jan sona sewi li lukin e jan Sitata e sinpin suno e lukin pi jan sewi la olin li lon pilin ona ·
taso jan ante ale la jan pona Kowinta li olin mute a e jan Sitata · jan Kowinta li olin e kalama uta suwi pi jan Sitata · ona li olin e nasin tawa pi jan Sitata · ona li olin e ale pi jan Sitata · mute la jan Kowinta li olin e kon insa e pilin wawa e wile suli pi jan Sitata · jan Kowinta li sona a : jan Sitata li sama jan sewi ante ala · ona li ike ala li toki nasa ala li powe ala li sama jan mute ante ala a · sama la jan Kowinta li wile ala ike li wile ala sama jan sona sewi mute a · ona li wile kama sona tan nasin pi jan Sitata, tan nasin pi jan pona olin · tenpo kama li lon la jan Sitata li kama sewi li kama jan suli a · ni li lon la jan Kowinta li wile lon poka pi jan Sitata, li wile pana tawa ona, li wile jo e ilo alasa ona, li wile lon pimeja ona ·
ni la jan ale li olin e jan Sitata · ona li pana e pona tawa jan ale a · ona li pana e musi tawa jan ale a ·
taso jan Sitata sama li pana ala e pona tawa ona, li pana ala e musi tawa ona sama · ona li tawa lon nasin kule pi ma kasi · ona li awen lon pimeja laso pi ma sona · ona li telo e sijelo ale lon telo sewi · ona li pana tawa sewi lon pimeja lili pi ma kasi kili · jan ale li lukin e luka suwi ona li olin e jan Sitata · taso pona en olin li weka tan pilin ona · sitelen lape en toki insa wawa li awen kama lon lawa pi jan Sitata tan linja telo, tan mun lili, tan linja suno · sitelen lape li kama la kon pi jan Sitata li ken ala lape tan seli pi pana sewi, tan lipu pi nasin sewi · lape ala pi kon ona li kama li kama li kama tan toki pi jan sona sewi ante a ·
jan Sitata li kama mama e pilin ike pi wile ala lon insa ona · ona li kama toki insa : ｢tenpo ale ala la olin pi mama tu en olin pi jan pona Kowinta li pana e pilin pona e moku sewi e pilin wile · pilin ni li kama weka｣ · jan Sitata li kama pilin e ni : mama ona en jan sona sewi li pana e sona ale ona tawa jan Sitata, li ken ala pana e sona sin · jan sona ante li kule e lawa ona · taso jan Sitata la kule ni li ale ala · kon insa pi jan Sitata li awen wile, li lape ala · kama sona li pini ala · jan li telo e sijelo kepeken nasin sewi la ni li pona · taso telo li weka ala e pali ike, li pona ala e wile kon, li moli ala e monsuta lon pilin · pana sewi en toki sewi li pona mute · taso ni li nasin ale anu seme? pana sewi li pona ala pona e tenpo kama? sewi la seme li lon? sewi Pajapasi li mama ala mama e ma? wan Aman li lon ala lon? sewi la mama li seme? mama li lon ala lon? tenpo en moli li lawa ala lawa e sewi? ni la pana sewi li pona ala pona? jan o pana sewi tawa jan seme? ona o pana ala pana tawa wan Aman taso? wan Aman li awen lon ma seme? ma seme la pilin pi pini ala ona li kalama a? ona li lon insa pi kon jan anu seme? kon sewi pi insa ale! kon sewi lon insa pi jan ale! taso kon ni pi insa ale li lon seme a? toki pi jan sona la kon li sijelo ala, li pilin ala, li toki ala · ni la ona li lon seme a? jan Sitata li toki : ｢mi wile lon ma sewi ni la mi wile lon ma pi kon mi pi wan Aman la, mi o alasa e nasin ante anu seme?｣ taso jan ala li sona e nasin ni · mama en jan sona en kalama pi pana sewi li sona ala a · jan pi sona sewi en lipu sewi ona li sona e ale a · tenpo mute la ona li toki e ale, li pini e sona · ona li sona e pali ma e open toki e open moku e kon insa e kon weka e pilin jan e pali sewi e ale a · taso ona li sona ala e wan suli e wan sewi taso la sona ale ni li suli ala suli?
lon la lipu mute li lon li toki e wan insa sewi ni · ni li lipu pona a · lipu la sitelen li toki : ｢kon insa li ma ale｣ · sitelen li toki : ｢jan li lape la ona li lon poka pi kon insa a li awen lon wan Aman｣ · sona wawa li awen lon lipu ni · lipu li poki e sona pi jan pini ale kepeken nimi wawa sama ko suwi tan pipi waso · a, jan o toki ike ala e sona mute pi jan sona mute · taso jan sona ale ni la jan seme li pali a? jan seme li sona taso ala a? jan seme li pali? jan lape li toki tawa wan Aman la jan seme li kama tan lape li kama wan Aman lon tenpo suno a? jan seme li pali li toki e ni? jan Sitata la jan pi sona sewi mute a li lon · suli la mama mije ona li lon li sewi mute · mama pi jan Sitata li jan pona · ona li pali pona, li ike ala, li toki sona · taso ona li sona mute la ona li awen pilin pona, li wile ala anu seme? ona kin li alasa e pona e wile anu seme? ona kin li awen pana tawa sewi, li telo e sijelo kepeken nasin sewi, li alasa e sona tan lipu · tenpo suno ale la ona wawa li weka e pali ike kepeken telo sewi tan seme? wan Aman li lon ala lon pilin ona, li pana ala pana e olin pi pini ala? jan Sitata li toki : ｢mi o alasa a! mi o alasa e sewi lon insa sama mi｣ · ale li alasa · tenpo ale la ona li alasa e nasin pona · taso ona li lon nasin ike ·
ni li pilin pi jan Sitata · ni li wile ona li apeja ona ·
tenpo mute la ona li lukin e lipu sewi li toki : ｢lon la nimi sewi li sewi Sajan · jan li sona e ni la ona li awen lon ma sewi｣ · tenpo mute la ma sewi li weka ala li poka lon pilin ona · taso tenpo ala la ona li lon · tenpo ala la jan Sitata li pini e alasa, li awen pi wile ala · sama la jan sona ala lon poka ona li kama sona e ma sewi ni · jan sona ala li pini e wile pi pini ala ·
jan Sitata li toki tawa jan pona : ｢jan Kowinta o! jan pona mi o kama lon poka mi · o awen lon anpa pi kasi suli ni · mi tu o awen lon kon · o wan e lawa｣ ·
ona tu li tawa kasi suli, li awen lon pimeja ona · jan Sitata li open li kama kalama On la ona li toki tan lipu sewi :
｢kalama sewi On pi ijo ale li sama ilo alasa · kon insa li sama palisa alasa · sewi li sama sike alasa · jan o alasa e sike · o pana e palisa lon insa kepeken ilo ona｣
tenpo pona li kama li pini la jan Kowinta li kama tan awen · suno li kama pimeja · tenpo pi nasin sewi li lon · ona li toki tawa jan Sitata · jan Sitata li toki ala · jan Sitata li awen lon sitelen insa · ona li lukin tawa sike alasa weka · uta ona la kon li kama ala kama? ni la ona li awen · toki insa li poki e sijelo ona · toki insa li kalama sewi On · kon ona li alasa e sewi Paman sama palisa alasa ·
tenpo pini wan la kulupu Samana li kama tawa ma lili pi jan Sitata · kulupu Samana li jan pi jo ala li alasa e wile ala · sijelo li sama palisa li wawa ala · ona li lili ala li suli ala li kepeken len lili · suno li seli pimeja e selo ona · pilin wan li poki e ona · ona li jan ike tawa jan ale li sama soweli lon ma jan · monsi kulupu la kon seli li tawa · ona li kon pi kalama lili · taso kalama kon li toki e utala mute e nasin pi wile ala e pakala sijelo ·
suno li kama weka la tenpo pi pilin insa li kama pini · jan Sitata li toki tawa jan Kowinta : ｢jan pona o, suno li kama sin la jan Sitata o tawa kulupu Samana · ona li kama jan Samana pi wile ala｣ ·
tenpo lili la jan Kowinta li kama sona e ni : jan Sitata li open e nasin sewi sin · tenpo kama ona li kama lon · ni la tenpo mi li kama sin · selo ona li kama walo mute sama selo kili pi telo ala ·
jan Kowinta li toki : ｢jan Sitata o! mama sina li wile ala wile e nasin ni? ona la sina ken ala ken jan Samana?｣
jan Sitata li lukin e ona kepeken lukin lape · tenpo lili a la ona li lukin sona e kon insa pi jan Kowinta · lukin ona li sama palisa alasa li alasa e sona kepeken tenpo lili · ona li sona e monsuta lon insa pi jan Kowinta · ona li lukin li sona e nasin anpa lon insa pi jan Kowinta ·
jan Sitata li toki lili : ｢jan Kowinta o · mi tu o toki e lon · suno li kama sin la mi open sin e nasin pi kulupu Samana · o toki ala e ni · jan ala o sona｣ ·
jan Sitata li tawa tomo pi mama mije ona · mama li lon supa pi linja kasi · jan Sitata li tawa lon monsi pi mama ona, li awen lon, li kalama ala · mama ona li pilin e lon pi jan ante · jan sona sewi ni li toki : ｢jan Sitata o, sina lon ala lon? o toki e wile sina｣ ·
jan Sitata li toki : ｢mama mi o, mi kama · sina ken e mi la mi wile tawa weka tan tomo sina · suno li kama sin la mi wile tawa kulupu Samana pi wile ala · sina ken e ni la mi wile kama jan ni｣ ·
tenpo suli la mama pi sona sewi li kalama ala · tenpo pi kalama ala li suli mute la mun lili lon sewi pimeja li tawa li ante · kalama li awen weka · mije lili li awen wawa li kalama ala · mama sona li awen lon supa li kalama ala · mun li tawa lon nasin sewi · tenpo li pini la mama li toki · ｢jan pi nasin sewi o toki ike ala o toki pona taso · taso insa pi pilin mi la ike li lon · mi wile ala kute sin e toki ni tan uta sina｣ ·
mama sona li kama tan supa kepeken tenpo suli · mije lili li awen, li kalama ala ·
｢sina awen tan seme a?｣ · mama li toki ·
ni la jan Sitata li toki : ｢sina sona e tan｣ ·
mama li awen pilin ike, taso ona li tawa tan tomo · mama li tawa tomo lape li kama lon supa ona ·
jan sona sewi li awen lon supa lape, taso lape li kama ala · ona li kama tan supa, li tawa mute, li tawa weka tan tomo lape · ona li lukin lon insa tomo kepeken lupa lili · insa la ona li lukin e jan Sitata · jan Sitata li awen lon, li kalama ala · walo li suno e len ona · monsuta li awen lon pilin la mama sona li tawa supa lape ·
jan sona sewi li awen lon supa lape, taso lape li kama ala · ona li kama sin tan supa, li tawa mute, li tawa weka tan tomo li lukin sewi · mun li suli lon sewi a · tenpo sin la ona li lukin lon insa tomo kepeken lupa lili · jan Sitata li awen lon, li kalama ala · suno mun li jasima lon noka ona · taso monsuta li awen lon pilin la mama sona li tawa supa lape ·
tenpo mute la ona li awen lon supa, li lape ala, li kama tan supa, li lukin lon insa tomo, li lukin e awen wawa pi jan Sitata · mije lili li awen lon suno pi mun lili lon len pi pimeja tomo · tenpo sin la mama li lukin lon insa tomo · ona li lukin e jan Sitata pi tawa ala lon ma sama la pilin ona li kama ike · pilin ona li ken ala lape li ken ala pona li ken ala suwi ·
tenpo pimeja li kama pini la mama li kama sin · ona li tawa tomo pi jan Sitata li lukin e ona · taso ona li lukin la mije lili li suli, li wawa, li sama jan ante ·
mama li toki : ｢jan Sitata o, sina awen tan seme?｣ ·
｢sina sona e tan a｣ ·
｢tenpo ale la sina wile awen a anu seme? sina wile lukin e sike ale pi tenpo suno lon ma sama anu seme?｣ ·
｢mi awen a｣ ·
｢sijelo sina li wile lape, jan lili o｣ ·
｢sijelo mi li wile lape｣ ·
｢sijelo sina li kama lape, jan lili o｣ ·
｢mi lape ala｣ ·
｢sina kama moli, jan lili o｣ ·
｢mi kama moli a｣ ·
｢ni la wile sina li moli · sina wile ala kute e wile pi mama sina, li wile moli a｣ ·
｢tenpo ale la jan Sitata li kute e wile pi mama ona｣ ·
｢ni la sina tawa kulupu Samana anu seme?｣ ·
｢jan Sitata o kute e wile pi mama ona｣ ·
suno li kama li walo e pimeja tomo · mama sona li lukin la noka pi jan Sitata li tawa lili tan weka wawa · taso sinpin pi jan Sitata la wawa li lon · lukin ona li tawa ala, li lukin e ma sama lon weka · ni la mama li kama sona : jan lili Sitata li awen ala lon tomo sama · kon ona li tawa a ·
mama li luka e sijelo pi jan Sitata ·
mama li toki : ｢sina o tawa ma kasi, o kama jan Samana : jan pi wile ala · sina kama sona e nasin pi pona wawa lon ma kasi la o kama sin tawa ma ni o pana e sona tawa mi · mi wile sona e nasin pi pona wawa · sina kama sona ala e nasin ni la o kama sin tawa ma ni o awen pali e nasin sewi lon poka mi · o tawa a · o uta e mama meli sina · o toki e pali sina · taso mi la tenpo pi telo sewi li lon｣ ·
ona li weka e luka tan sijelo pi jan Sitata li tawa weka · jan Sitata li wile tawa noka la sijelo ona li wawa ala · ona li lawa e sijelo ona, li anpa tawa mama ona lon noka, li tawa mama meli · ona li kute e toki pi mama ona ·
ona li tawa kepeken noka kiwen a · open pi tenpo suno li kama lon kulupu tomo lili la pimeja anpa li kama sewi lon tomo wan : ona li jan Kowinta ·
jan Sitata li uta pona, li toki tawa jan Kowinta : ｢sina lon｣ ·
jan Kowinta li lukin e jan pona : ｢mi lon a｣ ·
