Jańla, qosıǵım (Qayıpnazarov)
Júregimnen jay alıp,
Tayarlanǵan burınnan,
Qosıqlarım jetilip,
Atılıp shıq oyımnan.
Kirseń, qayta shıqpas bol,
Oqıǵannıń oyınan,
Xalıqtan kúsh al, talmas bol,
Ush Ámiwdiń boyınan.
Tara elden ellerge,
Xalıqtıń erlik isindey,
Jetken jeriń tıńlasın,
Bári bir zaldıń ishindey.
Sóziń bolsa jaǵımlı,
Kemisi joq músindey.
Tez taraysań xalıqlardıń,
Doslıǵınıń kúshindey.
Jańla, biyik kóteril,
Tınıshlıqtıń tuwınday.
Qumartqannıń kewline,
Quyıl kúnniń nurınday.
Tas qosıǵım aǵıslı,
Ámiwdárya suwınday.
Qıyalım teńiz bolsın da,
Qálemim júzsin quwınday.