Júregimdi qaytermen (Qayıpnazarov)

by Bayniyaz Qayıpnazarov

Júzge júz tústi de sol,
Tabıstı inkar kózler.
Uzamay bólinip jol,
Ayrılıp kettik bizler.

Izińnen ketti júrek,
Kózleriń menen kózim.
Aldıńa qoydım tilek
Juwapsız qaldı sózim.

Etpeseń qabıl óziń,
Unatıp sózlerimdi,
Ne ushın qara kóziń,
Tartadı kózlerimdi.

Ózime salsa men de,
Qolımdı bir siltermen.
Qosılıp ketken sende,
Júregimdi qaytermen.