Inviandole un fiasco di cedro
Carlo Maria Magg (1630-1699)
Inviandole un fiasco di cedro
Ve mand sti quatter gott d'agher de zeder
de tœu a bonora, dopo el mattutin;
ma prima, refreschel col sidellin,
tant ch'el lassa la nivola sul veder.
Tucc quij ch'el tujaran diran de cœur:
"Signor, fee vost amis chi l'ha mandaa!
Fee fà in tuttcoss la vosta volontaa
de lu, di sœu fancitt, di sœu fiœur!
Miee, nœura, nevod e servitù,
parent amis, e inimis se ghe n'è,
tucc faghen volontera el vost vorè
che inscì de bass, com'el se fa lassù!
Ch'el faghen volontera in Francia, in Spagna,
per tutt el mond, perfinna in Calicutt!
Vegna el vost regn, ch'è regn d'amor, per tutt,
e sarà tutt el mond ona cuccagna!
Allora, sott i ciav del vost san Peder,
s'unirà tutt el mond, con sicurezza,
tutt in la vosta pas!" - Oh, che dolcezza,
el m'ha miss in del cœur st'agher de zeder!