Hamborger Janmooten/Hamborger Jung

[9]Hamborger Jung: goh in de Welt,
lehr ingelsch un verdeen di Geld,
seuk di de besten Happen ut
un slog de annern op de Snut!
Paß op den Kneel un dreih nich bi:
di könt se all, versteihst du mi?.
Spel jümmer leber Herr as Knecht:
de Boos is, de hett jümmer Recht.
Holl vull dien Seils, lot weihn dien Flagg,
segg de Schinesen Goden Dag,
goh gern mol op de Tigerjagd,
nimm gern mol Mexiko in Pacht,
stieg no de Pyramiden rop,
stell de Molukken op den Kopp,
keup bi de Lappen Tron un Smeer,
verkeup de Inkas Köm un Beer,
preuf den Passot un den Monsun,
scheet Krokodilln in Kamerun,
smeuk gern mol’n Piep vull Opium,
snack gern mol’n Zulukaffer dumm,
box gern mol mit en Eirischmen
un plant di mol op’n Ätna hen,
[10]mok gern mol Orangutans tohm,
ried gern mol Guanakos lohm,
seuk Diomanten in Südwest
un frei di, wenn jem funnen hest,
nimm gern mol ’n Geisha op den Schot,
hau gern mol ’n Schock Moskitos dot,
stoh gern mol boben op de Roh,
beseuk in Persien den Schoh,
krüz um Kap Horn un warr nich bang,
ok nich vorn grote Riesenslang,
drink gern mol seuten Xereswien,
sloop gern mol unner Palmen in,
mok mit de Törken di bekannt,
goh gern mol in Neeyork an Land,
danz mit de Yankees ingelsch Jeck:
dat gift dien Schipp noch lang keen Leck!
Man dat holl fast in Storm un Dook:
dien ole nedderdütsche Sprook!
Un wenn du Ost un Süd un West
bekeken un beroken hest,
denn kumm bi Dogen wedder trügg
no Jumpfernstieg un Lombardsbrügg,
no Reeperbohn un Hoppenmark,
no Michel- un Kotrinenkark,
un seuk di hier (dat deist ok gern!)
een seute Hanseotendeern!
Un denn, mien Jung, holl gern mol stopp
un drück ehr gern mol Eenen op!