Húrmetińizge (Qayıpnazarov)
Qásterlengen qarashıqtay kózdegi,
Beruniyli shamshıraqsız bizdegi.
Eldiń kewli pitip saqıy gúzdegi,
Qutlı bolsın aytar jeńisińizge.
Atayı diyqannıń nusqası bolıp,
Paxta kásibiniń ustası bolıp,
Tonnalar jıynalıp, planlar tolıp,
Xalqım alǵıs aytar hár birińizge.
Járdem etip awıl menen qalamız,
Mol zúráát berdi paxta dalańız,
Isińdi bahalap watan — anamız,
Altın juldız taǵar óńirińizge.
Túnlerde tursańız uyqıdan qashıp,
Tańlarda shıqsańız jigerler tasıp,
Tıńlarda júrseńiz partawdı ashıp,
Jerler bawırın iyer miynetińizge.
Jerge ter tóktińiz miynetti súyip,
Qız, jigittiń sheber qolları tiyip,
Aq altın qırmanın qoyıpsız úyip,
Xámme qayıl qalar xızmetińizge.
Sizler úygen aq taw kóklerdi qushıp,
Kózler toyat alar, júrekler yoshıp,
Erlik isińizdi qosıqqa qosıp,
Shayır dástan jazar húrmetińizge.