Gramat Volapüka/Nüdugot
| ← Ninädalised | Nüdugot Gramat Volapüka |
Diläd: I → |
1. Gramat Volapüka bejäfon uti valik, keli mutoy sevön pro gudiks penam, reid e spikam Volapüka.
Volapük diseinon te ad binön medöm fasilik suema bevünetik. Steifon ad dakipön mögiküno vödedis bevünetik pato latinikis nolavas difik, e nemis taleda soäsä papenons ma tatapüks calöfik difik me tonats latinik. Te de vödeds jäfüdik e de nems taledavik mödiko komädöls vöds Volapükik dabinons (l. dilädi VIid!).
Sekü kods at gramat Volapüka muton ninädön noe Volapükikis fomiri, tümologi e süntagi abi utosi valik, kel zesüdon pro pron verätik vödas natapükik, kels mutons palecedön tefü Volapük as foginavöds.
Sekü bligäd at gramat Volapüka ninädon dilädis sököl:
Diläd: I. Lafabs e malüls.
Diläd: II. Fomir.
Diläd: III. Tümolog.
Diläd: IV. Süntag.
Diläd: V. Natapüks.
Diläd: VI. Vödeds Jäfüdik.
Noet: 1. Vp. pedatikon fa ‚Johann Martin Schleyer‘ [yohánĕš mártin ǰláĭĕr] ün tim et: vilagapädan romakatulik in ‚Litzelstetten‘ [lìžĕlǰtä́tĕn] nilü ‚Konstanz‘ [kón-štánž] in Badän (Deutän) ün 1879 mäzula d. 31id. ‚J. M. Schleyer‘ pemotom in ‚Oberlauda‘ [obĕrlàŭda] in Badän ün 1831 yulula d. 18id ed edeadom in ‚Konstanz‘ ün 1912 gustula d. 12id.
As datikan Vpa ‚Schleyer‘ äbinom i cifal Vpanefa ä dilekan kadäma Vpa. Ecälom me büad dätü 1910 dekula d. 3id as fovan oka pos deadam okik söli: ‚Albert Sleumer‘ [álbĕrt šlóĭmĕr]: ‚doctor philosophiae et theologiae‘‹ ün tim et: ‚Direktor‘ [dirä́k-2tór] ela ‚Hildegardislyzeum‘ [hildĕgárdiš ližèum] in ‚Bochum‘ [bóqum] in Preusän (Deutän), äd anu: lautan in ‚Godesberg‘ [gò̱dĕšbä̯rk] len ‚Rhein‘ [ráĭn] in Preusän.
Noet: 2. Kadäm Vpa. pestidon pötü Vpa kongred telid pijenüköl in ‚München‘ [münqĕn] in Bayän (Deutän) ün 1887 de d. 6id jüesa d. 9id gustula.
Noet: 3. Buks padabüköl fa u nämätü kadäm Vpa opubons in tanäd klilagedik, e podekons löpo su föfaflan ko siämamäk Vpa.
Siämamäk at Vpa binädon me talaglöp, laböl diamet lunotü zimmet bal, su feled gedik sirköfik labü diamet lunotü zimmets tel. Su feled gedik löpo vöd: Volapük binon, e dono spiked Vpa: Menefe bal, püki bal. Tonats e däsinot talaglöpa blägons, e mels in talaglöp vietons.
| ← Ninädalised | Nüdugot Gramat Volapüka |
Diläd: I → |