Gramat Volapüka/Ä. Subsat
| ← A. Noets valemik | Ä. Subsat Gramat Volapüka |
B. Lartig → |
41. Gen gramatik vödas, kels sinifons godis, pösodis, nimis, e planis (u floris) manikis, binon manik.
Vöds, kels sinifons godis, pösodis, nimis e planis (u floris) vomikis, labons geni vomik.
Gen vödas votik valik binon neudik.
Plan, yeg u suemod neyegik papösodöls lüsumons geni pösodas, kelis elüsumons.
42. Valemo nems dabinädas lifik sinifons bidis dabinädas, nendas gen onas patikon. A.s.: men, flen, bub, kat.
De vöds neudik at, vöds manik pafomons dub pladam foyümota: hi⸗ fo vöds tefik. A.s.: hireg, hiflen, hikat, hidog.
Vöds vomik pafomons dub pladam foyümota: ji⸗ pla foyümot: hi⸗ fo vöds neudik tefik. A.s.: jireg, jiflen, jikat, jidog.
Näi vöds manik e vomik pefomöls me foyümots: hi⸗ e ji⸗‹ vöds patik binons, kels no pedefomons me foyümots at de vöds votik. Sams:
| man | e | himen, | vom | e | jimen, | |
| fat | e | hipal, | mot | e | jipal, | |
| tor | e | hibub, | kun | e | jibub. |
43. Nems elas ‚castrati‘ [káštràti]: dabinäds penegenüköl‹ pafomons me foyümots: ho⸗ e jo⸗. A.s.: homen, hojevod, hobub, hogok, jobub, jogok, …
Pro vödidefomams votik logolöd dilädi IIIid!
44. Deklin subsata binon so (l. i. § 40!):
| Balnum. | Plunum. | |
|---|---|---|
| 1. nom. | dog, | dogs, |
| 2. gen. | doga, | dogas, |
| 3. dat. | doge, | doges, |
| 4. kus. | dogi, | dogis, |
| 5. vok. | o dog! | o dogs! |
| ← A. Noets valemik | Ä. Subsat Gramat Volapüka |
B. Lartig → |