Gorkiyge (Qayıpnazarov)
Keń baxıtqa bolǵan kumar,
Gúreste jeńimpaz ediń.
Qanatı qayrılmas suńqar,
Qaxarman dawılpaz ediń.
Azatlıqtı súygen seniń,
Xalıq túsindi júregińdi.
Seni yadqa saqlap eliń,
Súyip oqır miynetińdi.
Meniń de qolımnan túspes,
Sen dóretip ketken «Ana»,
Júregimde atıń óshpes,
Kórkem sózge sheber dana.
«Ana» hám «Dawılpaz» jırın,
Oqıp úlgi aldım sennen,
Úyrettiń ómirdiń sırın,
Men seni ustazım deymen.