Gh'era ona sira in teater l'Omm de Preja
Giusepp Bernardon (1771-1860)
Gh'era ona sira in teater l'Omm de Preja
Gh'era ona sira in teater l'Omm de Preja
cioè Franzesch, insemma a soa miee,
ai cugnaa, a Beatris, e cont dedree
i solet mennapolta in gran livreja.
Tra quist, gh'era quello muso de ruee
d'on cont Saurau, che, avend veduu in plateja
vun col cappell in coo, ghe ven l'ideja
de andà giò per levaghel del scimee.
Defatt, fœura del palch, giò per la scara,
el va al vundes a drizza in prima fila,
e, dent là, al parapett, on gran coppon
a quell tal sott al palch el ghe refila,
e el ghe trà giò el cappel, disen: "Impara,
a stà descappellaa quand gh'è el padron!"
Vardee che bella azion!
Degna d'on ver todesch!... D'on mozz de stalla!
D'on Cont governador col bast in spalla!
Già, el proverbi nol falla!
Di sciocch ven fœura i tapp: e, di pattan,
legnad, s'giaff, scoppellott, tratt de villan!
E, de per tutt Milan,
i biricchitt no g'han sta canzon:
"Te doo on saurau..." in scambi d'on coppon!
Oh, che minister bon!
Senza spesa el fa cress el Cherubin
d'ona fras nœuva tolta al Meneghin!
E a mi, che sont bosin,
el me dà l'argoment de fa on sonett
cont tant de cova, senza spend on ett!
Quest l'è proppi on soggett
che merita de faggh on partii grass
mandandel a fà fœugh da Satanass!