Gezedi báhár (Qayıpnazarov)
Tábiyat qızın uyqısınan oyatıp,
Tań jeline ziya-zulpın tawlatıp,
Kúlkisine tawı-tastı jańlatıp,
Turan oylarında gezedi báhár.
Tawda giya bórtip, sayda suw tasıp,
Sáwirdiń samalı zeynińdi ashıp,
Shámenler pákize juparın shashıp,
Ámiw boylarında gezedi báhár.
Sahra óz jamalın kúnge súygizip,
Nurın tartıp alar tóske tiygizip,
Keń jazıqqa jasıl lipas kiygizip,
Ústirt qırlarında gezedi báhár.
Kók shıqqan jerlerge qoyın órgizip,
Júrgen shopanlarǵa bilek túrgizip,
Tańnan kún batqansha qozı tergizip,
Qızıl qum qoynında gezedi báhár.
Shaúalar jasarsa jańa búr atıp,
Shaypáshekler shıqsa jerdi jaynatıp,
Shoqtay qızıl gúlge ǵumsha baylatıp,
Úlkemniń baǵında gezedi báhár.