Gerbish óriwshige (Qayıpnazarov)
Áy óriwshi dostım xár kúngi isiń,
Sóyler jıllar boyı ómir jolıńnan.
Tırnaǵınan baslap órgen gerbishiń,
Kókke qaray jeteleydi kolıńnan.
Qolıńda masterok, qolıńda gerbish
Órgenińdi kózler ilmey qaladı.
Sheber kolıń menen qalanǵan hár ǵısh,
Óz ornın tapqanın bilmey qaladı.
Áne bastıń sońǵı gerbishińdi de,
Jay pitti, texniktiń kewiline unap.
Sen maqtanısh etip óz isińdi de,
Kewlig kóterińki turıpsan qarap.
Birinen soń biri tikleydi boyın,
Kóp etajlı jaylar kókke talasıp.
Janınan ótkenniń tartadı oyın,
Taza imáratlar turǵan jarasıp.
Jıllar óter, taza jaylar kóbeyer,
Sulıw-sulıw imáratlar qurarsan.
Nókisimiz bunnan beter kórkeyer,
Bir balkonda sen de karap turarsań.
Áy óriushi dostım, hár kúngi isiń,
Sóyler jıllar boyı ómir jolıńnan.
Tırnaǵınan baslap órgen gerbishiń,
Kókke qaray jeteleydi qolıńnan.