Gaz atlaǵan (Qayıpnazarov)
Ada bolmas ana jerdiń baylıǵın,
Bizge saqlap kelgen biraz waqlapdan,
Qaldırmastan alıw ushın barlıǵın,
Qızıl qumdı, qıya sheldi aqtarǵan.
Texnikaǵa ústi tolı qırlardıń,
Hayran qalar kiyigi de, qusı da,
Dástan etip talay ańız, jırlardıń,
Táriplegen adamları usı da.
Kese túsip kólbep jatkan Ámiwge,
Adam keldi trubanı jetelep,
Buxaradan Uralǵa gaz beriwge,
Jolsız jerden jol salmaǵa tótelep.
Asqar-asqar qumnan asıp kelemiz,
Áne alda tikjar Dúldúl atlaǵan.
Atlaǵan ba, joq pa, qaydan bilemiz,
Bul ańız sóz uzaq jıllar saqlaǵan.
Eki jaǵa eleń-eleń etedi,
Sol Dúldúldiń dúbirlisi kelgendey,
Taǵı tereń oyǵa shúmip ketedi,
Ústinen gaz ótejaǵın bilgendey.
Jar ústinde jedelli is baslandı,
Júwenleydi ójet, erke Ámiwdi,
Jaǵadaǵı tasqa qursaw taslandı,
Kóreseń be anaw úlken temirdi?
Usı temir tutastırǵan jaǵanı,
Ash beline taw minse de talmaǵan.
Búgin mine batır eldiń adamı,
Dáryadan da gaz ótkerip atlaǵan.
Dúldúl emes gaz atladı bul jerden,
Usı haqıyqatlıq yosh berdi maǵan.
Er júrek adamlar eken ótkergen,
Bunı táripleseń turaman saǵan!